«Ժողովուրդ» օրաթերթը գրում է. ««Ժողովուրդ» օրաթերթի տեղեկություններով՝ Արմավիրի մարզպետ Վահրամ Խաչատրյանը մեծ ցանկություն ունի առաջիկայում կրկին ստանձնելու Մեծամորի համայնքապետի պաշտոնը։
Իշխանական համակարգում սպասվող փոփոխությունների ֆոնին մարզպետների համար հարց է առաջանում՝ ո՞ր պաշտոնում շարունակել քաղաքական կարիերան, եթե մարզպետարանների ներկայիս համակարգը վերակազմավորվի և փաստացի լուծարվի։
Բանն այն է, որ իշխանությունը քննարկում է տարածքային կառավարման համակարգի փոփոխության և մարզպետարանների կառուցվածքի վերափոխման հարցը։ Օգոստոսին մամուլում հրապարակումներ եղան նաև մարզպետների լիազորությունների կրճատման և նոր համակարգի ձևավորման հնարավորության մասին։ Այս ֆոնին, ըստ «Ժողովուրդ» օրաթերթի աղբյուրների, Վահրամ Խաչատրյանը ցանկանում է իր հետագա պաշտոնավարման հարցը լուծել՝ վերադառնալով այն համայնք, որտեղից էլ սկսել է իր քաղաքական վերելքը։
Վահրամ Խաչատրյանը նախկինում եղել է Հանրապետական կուսակցության անդամ և 2016 թվականին ընտրվել Նորապատ համայնքի ղեկավար։ 2018 թվականի՝ իշխանափոխության օրերին նա հայտարարել էր, որ հրաժարվում է ՀՀԿ-ից։ Հետագայում դարձավ «Քաղաքացիական պայմանագիր» կուսակցության անդամ։
2021 թվականին Խաչատրյանը նշանակվեց Արմավիրի մարզպետի տեղակալ, ապա՝ Մեծամորի համայնքի ղեկավարի ժամանակավոր պաշտոնակատար։ Նույն տարվա դեկտեմբերի 5-ի ընտրություններից հետո նա ընտրվեց Մեծամորի համայնքապետ։ Իսկ 2025 թվականի սեպտեմբերի 4-ին Կառավարության որոշմամբ՝ նշանակվեց Արմավիրի մարզպետ։
Վահրամ Խաչատրյանի պաշտոնավարման տարիներն ուղեկցվել են նաև քննադատական հրապարակումներով։
2026 թվականի ապրիլին մամուլում հրապարակումներ եղան Արմավիրի մարզի դպրոցներում և մանկապարտեզներում աշխատակիցների քաղաքական նախընտրությունների վերաբերյալ ցուցակներ պահանջելու և հնարավոր ճնշումների մասին։
Մարզպետի շուրջ մեկ այլ քննադատության առիթ դարձան նաև մարզի դպրոցներում «փառքի անկյունները» հեռացնելու գործընթացի մասին հրապարակումները։
Իսկ 2026 թվականի հոկտեմբերի 20-ին հրապարակվեց նաև տեղեկություն, ըստ որի՝ Վահրամ Խաչատրյանը փորձել էր Արմավիր համայնքի ղեկավարի ընդդիմադիր թեկնածու Ռազմիկ Այվազյանին համոզել՝ չառաջադրվել նրա՝ նոր զորակոչված որդուն վերաբերող հանգամանքը հիշատակելով։ Մարզպետը հերքել է այդ պնդումը և հայտարարել, որ դատի կտա Դանիել Իոաննիսյանին։
Այս ամենի համատեքստում Խաչատրյանի հնարավոր վերադարձը համայնքային կառավարման համակարգ հարց է առաջացնում՝ արդյոք Մեծամորը նրա համար կրկին քաղաքական հենակետ դառնալու հնարավորություն է, թե՞ մարզպետի պաշտոնից հետո պարզապես կառավարման ավելի հարմար հարթակ։
2026 թվականի ապրիլին «Ժողովուրդ» օրաթերթը հրապարակեց Վահրամ Խաչատրյանի ունեցվածքը։ Որպես թանկարժեք անշարժ գույք նա հայտարարագրել է 33 հազար դոլար արժողությամբ Rolex տեսակի ժամացույց, 20 մլն դրամ արժողությամբ ոսկյա զարդեր։
Որպես թանկարժեք գույք մարզպետը հայտարարագրել է նաև 50 մլն 131 հազար դրամ արժողությամբ բնակարանի գնման իրավունք։
Խաչատրյանի բանկային հաշիվների մնացորդները կազմել են 2 հազար 469 դրամ։
Կանխիկ դրամական միջոցները կազմել են 3,8 մլն դրամ, 20 հազար դոլար, 78,5 հազար եվրո։
Հաշվետու տարվա եկամուտները կազմել են 13 մլն 499 հազար դրամ, որից 8 մլն 332 հազարն աշխատանքի վարձատրություն է Արմավիրի մարզի Մեծամորի համայնքապետարանից։
Այսպիսով, նախկին ՀՀԿ-ականը հիմա էլ դարձել է հավատարիմ ՔՊ-ական ու կարիերան շարունակում է նախկին, մերժված բարքերով։ Եվ ՔՊ-ն դա ողջունում և խրախուսում է»։
Առավել մանրամասն թերթի այսօրվա համարում
