«Շատ ծանր սոցիալական վիճակում են գտնվում արցախցիները։ Պարբերաբար կարող եք մամուլում էլ հանդիպել դեպքերի, թե ինչպես են ընտանիքները՝ իրենց երեխաների հետ, մնում դրսում։

Դա, իհարկե, պետության սոցիալական քաղաքականության կամ արցախցիների դեպքում դրա բացակայության արդյունք է։ Նշվեց, որ բնակարանային ապահովման ծրագիրը խափանված է, մեծ մասամբ հաջողված չէ։ Այդպես էլ կա։ Եվ, գիտեք, այստեղ կարևոր է խոսել, որ նույնիսկ այն ընտանիքները, ովքեր ձեռք են բերել բնակարան, իրենք էլ են շատ ծանր սոցիալական վիճակում գտնվում։ Մի կետ՝ վարկային միջոցներով ձեռք են բերել բնակարան, և մի փոքր տատանում, աշխատանքից հեռացում, առողջական խնդիր ընտանիքի որևէ անդամի մոտ, և այդ ընտանիքներն էլի հայտնվում են անելանելի իրավիճակում։

Էլ չեմ ասում, որ տասնյակ հազարավոր ընտանիքներ չեն կարողանում բնակարան ձեռք բերել, չեն կարողանում տատանվող վարձավճարների պայմաններում այդ վարձավճարը տալ և էլի հայտնվում են դրսում»,- այս մասին այսօր՝ սեպտեմբերի 28-ին, «Արցախը երեք տարի անց․ փաստեր, քաղաքական պատասխանատվություն և ապագայի օրակարգ» քննարկման ընթացքում հայտարարեց Արցախի Հանրապետության հանրային խորհրդի անդամ Նարե Սիմոնյանը։

Մանրամասն՝ տեսանյութում։