ԱԺ «Հայաստան» խմբակցության պատգամավոր Գառնիկ Դանիելյանը գրում է․
«Արմավիրի մարզի Սարդարապատ համայնքի դպրոցի տնօրենի ֆեյսբուքյան գրառումից տեղեկացանք, որ վերջինս Արցախի դրոշը դպրոցի «Փառքի անկյունից» չհեռացնելու համար աշխատանքից ազատման դիմում է գրել։
Կարինե Սմբատյանի արարքը արժանապատվության դրսևորում է։ Այս տեսակի շնորհիվ է, որ ազգային կրթությունը անսասան է մնում մեր ինքնությանը պատերազմ հայտարարած իշխանությունների պարագայում․
«Պաշտոնը ժամանակավոր է, հայրենիքը՝ հավերժ։ Իմ հեռացումը կամ պաշտոնից զրկվելը փոքրագույն գինն է այն ամենի դիմաց, ինչին ես հավատում եմ և ինչին ծառայում եմ»․ գրել էր տնօրենը։
Ցավոք, կրթության ոլորտում կան նաև այնպիսիք, որոնք իշխանությանը հաճո լինելու համար կարող են կրթական հաստատություններից հեռացնել մեր հերոսների լուսանկարները կամ մասնակիցը դառնալ հակաեկեղեցական արշավին։
Բայց կան նաև տիկին Կարինեի պես անհատներ, որոնք երբեք դեմ չեն գնա մեր պատմությանը, ինքնությանն ու ազգային արժեքներին։
Ամեն ինչ անցողիկ է, այդ թվում՝ իշխանությունը, սակայն անջնջելի է պատմական հիշողությունը, որն էլ պահում է մեզ որպես ազգ և ամբողջություն։
Առաջիկա ընտրությունը լինելու է ընտրություն արժեքների և ուրացման քաղաքականության միջև։ Արարատը որպես ինքնության սիմվոլ, Ցեղասպանությունը որպես պատմական հիշողություն մեր միջից ջնջել փորձողները, Արցախ անվանումից և անգամ դրոշից սարսափողները չպետք է ունենան վերարտադրվելու որևէ հնարավորություն։
Հիացմունքս և աջակցությունս եմ հայտնում Կարինե Սմբատյանին։ Վստահ եմ, որ իր համարձակ քայլից գոտեպնդվելու են շատերը՝ տեղի չտալով օրվա իշխանությունների հակազգային քարոզչությանը»։
