Պենտագոնը ՆԱՏՕ մի քանի երկրների խնդրել է մեղմել Ռուսաստանից բխող սպառնալիքի վերաբերյալ հռետորաբանությունը, Reuters-ին հայտնել են իրազեկ աղբյուրները։ Մասնավորապես, նման խնդրանքներ են ստացել Էստոնիան, Լատվիան և Լիտվան։ Հարցը քննարկվել է Պենտագոնի քաղաքականության բաժնի ղեկավար Էլբրիջ Քոլբիի հետ հանդիպումներում․ նա առանցքային դեր է խաղում Եվրոպայում ամերիկյան զորքերի թվաքանակի վերանայման գործում։

Ամերիկացի պաշտոնյաների ուշադրությունը գրաված հայտարարությունների թվում է եղել եվրոպացի առաջնորդների այն պնդումը, թե Ուկրաինայի դեմ պատերազմի պատճառով Ռուսաստանն «առնետի պես անկյուն է քշված» և դիմում է ավելի ու ավելի հուսահատ քայլերի։ Reuters-ի զրուցակիցը նշել է, որ նման հռետորաբանությունը բնութագրվել է որպես «անօգուտ»։ Նրա խոսքով՝ Քոլբին նաև խնդրել է բալթյան երկրներից մեկի ներկայացուցիչներին դադարել «գրգռել» Ռուսաստանին և «զսպվածություն» ցուցաբերել։ «Մենք օգնում ենք ձեզ։ Ամերիկացիներն այստեղ են։ Պարզապես մի՛ աղմկեք։ Աղմուկ մի՛ բարձրացրեք», — Պենտագոնի ուղերձն այսպես է վերապատմել եվրոպացի պաշտոնյան։

ԱՄՆ ռազմական գերատեսչության խնդրանքը առճակատման ոճով չի ներկայացվել, սակայն տարակուսանք է առաջացրել, նշել են Reuters-ի զրուցակիցները։ Պենտագոնը պաշտոնապես չի հաստատել ՆԱՏՕ երկրներին դիմելու փաստը։ «Դաշնակիցների միջև մասնավոր զրույցները պարզապես մասնավոր զրույցներ են, ուստի մենք չենք մեկնաբանի այս մեղադրանքները», — ասել է գերատեսչության ներկայացուցիչը։

Ինչպես հիշեցրել է Reuters-ը, սեպտեմբերի վերջին Էստոնիայի վարչապետ Քրիստեն Միխալը Վլադիմիր Պուտինին անվանել էր «անկյուն քշված առնետ» և ենթադրել, որ Ռուսաստանը Եվրոպայում դիվերսիաների է դիմում, քանի որ ավելի ու ավելի է խրվում Ուկրաինայի դեմ պատերազմի մեջ։

Ռուսաստանին սահմանակից բալթյան երկրները մտահոգված են ռուսական սպառնալիքով։ Վերջին տարում մտավախություններն ուժեղացել են նրանց տարածք պարբերաբար ներթափանցող անօդաչու թռչող սարքերի պատճառով։ Եվրոպական երկրները Ռուսաստանին նաև դիվերսիաների մեջ են մեղադրում։ Վերջին միջադեպերից մեկը տեղի է ունեցել Գերմանիայում, երբ Լայպցիգի օդանավակայանում ուկրաինական տրանսպորտային ինքնաթիռի մոտ հայտնաբերել են անօդաչու թռչող սարք՝ դրան ամրացված պայթուցիկով։

Վլադիմիր Պուտինն իր հերթին հայտարարել է, որ Մոսկվան չի ցանկանում պատերազմել Եվրոպայի հետ և չի ծրագրում հարձակվել ՆԱՏՕ երկրների վրա, սակայն պատրաստ է ռազմական հակամարտության։ «Դե, իսկ եթե բանն ավելի հեռու գնա, ապա հաղթողներ ընդհանրապես չեն լինի։ Թող ոչ ոք այդ մասին չմոռանա», — նախազգուշացրել է Պուտինը։