Ի դեպ, Երևանի քաղաքապետը հայտարարում է, որ շենքերը խցանումներ չեն ստեղծում, մարդկանց ավտոմեքենաներն են ստեղծում խցանումներ՝ դրանով փորձելով րդարացնել Երևանում անկանոն շինթույլտվոււթյունները, սնկի պես աճող շենքերը։
Հետո մեղքը իրենից գցելու համար ասում է՝ 2021-ին էին շենքերի ու համալիրների ռեկորդային՝ 108 թույլտվություն տվել։
Բայց արդյո՞ք հնարավոր է տարանջատել նորակառույց բազմաբնակարան շենքերն ու դրանց հետևանքով ավելացող ավտոմեքենաների թիվը։
Ենթադրենք՝ այդ 108 շինթույլտվությունների արդյունքում կառուցվել են բազմահարկ շենքեր, բիզնես և այլ կենտրոններ, յուրաքանչյուր շենք և յուրաքանչյյուր կենտրոն քա՞նի հարյուրով է մեծացնում ավտոմմեքենաների թիվը։
Իհարկե, շենքն ինքնին չի երթևեկում և խցանում չի առաջացնում։ Բայց այդ շենքում բնակվող հարյուրավոր ընտանիքներն ամեն օր օգտվում են քաղաքի ճանապարհներից, ջրից, գազից, էլեկտրաէներգիայից, օգտվում են աղբահանության ծառայություններից։ Այսինքն՝ նորակառույցների հետևանքով մեծանում է ոչ միայն բնակչության խտությունը, այլև քաղաքի ենթակառուցվածքների ծանրաբեռնվածությունը, այդ թվում՝ մեքենաների։
Եվ սա դեռ ամենը չէ։ Հիշեցնենք՝ 2018 թվականին իշխանության գալուց հետո Երևանի գլխավոր ճարտարապետը խոստանում էր, որ քաղաքի կենտրոնում այլևս շինթույլտվություններ չեն տրամադրվելու։ Սակայն այսօր մայրաքաղաքում շարունակվում է ինտենսիվ շինարարությունը։
ՀՀարցն այն է, թե քաղաքային իշխանությունն արդյոք հաշվարկո՞ւմ է, թե յուրաքանչյուր նորակառույց շենք ինչ լրացուցիչ բեռ է ստեղծում քաղաքի համար։ Այնպես որ Տիգրան Ավինյանի խոսքը, թե շենքերը խցանումներ չեն ստեղծում, կարծում ենք՝ բոլորովին արդարացված չէ։





