Սահմանադրական դատարանին չհաջողվեց նախագահ ընտրել։
Հիշեցնենք, որ, ինչպես ավելի վաղ հայտնել էր «Փաստինֆո», ՍԴ նախագահի պաշտոնի համար պայքարում էին Վլադիմիր Վարդանյանը և Էդգար Շաթիրյանը։
Նշենք՝ արդեն շուրջ չորս ժամ է, ինչ ՍԴ-ում շարունակվում է նախագահի ընտրությունը։
ՍԴ նախագահ Արման Դիլանյանի պաշտոնավարման ժամկետը լրացել է հոկտեմբերի 12-ին, վերջինս այդ պաշտոնում ընտրվել էր 2020թ․ -ին։ Մինչ այդ ՍԴ նախագահը Հրայր Թովմասյանն էր։
Գործող օրենքով ՍԴ նախագահը վերընտրվելու իրավունք չունի։ ՍԴ մասին սահմանադրական օրենքի համաձայն՝ ՍԴ կազմից նախագահ կարող է ընտրվել ՍԴ դատավորների առաջադրած կամ ինքնաառաջադրված այն թեկնածուն, որն ստացել է Սահմանադրական դատարանի դատավորների ընդհանուր թվի ձայների երկու երրորդը, իսկ այն դեպքում, երբ առաջադրվել է մեկ թեկնածու, ապա նա ընտրվում է Սահմանադրական դատարանի դատավորների ընդհանուր թվի ձայների մեծամասնությամբ: Եթե առաջադրված երկու կամ ավելի թեկնածուներից ոչ ոք քվեարկության արդյունքով չի ստանում անհրաժեշտ թվով ձայներ, ապա հնգօրյա ժամկետում անցկացվում է ընտրության երկրորդ փուլ, որին մասնակցում են առաջին փուլում առավել ձայներ ստացած երկու թեկնածուները: Ընտրության երկրորդ փուլի արդյունքով ընտրված է համարվում այն թեկնածուն, որն ստացել է Սահմանադրական դատարանի դատավորների ձայների ընդհանուր թվի մեծամասնությունը։
Անհրաժեշտ թվով ձայներ չստանալու դեպքում ընտրությունը համարվում է չկայացած, և կազմակերպվում է նոր ընտրություն։ ՍԴ նախագահն ընտրվում է վեց տարի ժամկետով։
