«Ձեզ եմ ուզում ներկայացնել հարկեր հավաքելու անվան տակ բյուջեն հարկերից զրկող պետական ֆենոմենի մասին և ներկայացնել հաղորդում հանցագործության մասին՝ պաշտոնատար անձանց կողմից պաշտոնական լիազորությունների չարաշահման և պետական բյուջեին էական վնաս պատճառելու առերևույթ դեպքի առթիվ։
Այսօր Հայաստանի Հանրապետությունում շուրջ 60 ընկերություն ապօրինի կապարակնքված է։ Դրանք տարբեր անձանց պատկանող ընկերություններ են, իսկ հիմնավորումն այն է, որ տվյալ բիզնեսները հարկեր են թաքցրել։
Հիմա՝ իրավիճակի զավեշտը։ Ես ընդամենը երեք ընկերության մասով պաշտոնական հարցում եմ ուղարկել Պետական եկամուտների կոմիտե և ստացել պաշտոնական պատասխան, որ նախորդ տարի նույն ժամանակահատվածում՝ խոսքը ընդամենը մեկ ամսվա մասին է, միայն երեք ընկերություն պետական բյուջե է վճարել ավելի քան 100 միլիոն դրամի հարկ։
Այսինքն՝ Քննչական կոմիտեի և ՊԵԿ-ի ապօրինի գործողությունների հետևանքով ընդամենը երեք ընկերության մասով պետական բյուջեն զրկվել է ավելի քան 100 միլիոն դրամից»,- այս մասին ԱԺ իր ելույթում ասաց «Հայաստան» խմբակցության պատգամավոր Ագնեսա Խամոյանը։
Մանրամասն՝ տեսանյութում։
