Ուկրաինական պատվիրակությունը բանակցություններ է անցկացրել ԱՄՆ նախագահի հատուկ բանագնաց Սթիվ Ուիթքոֆի և Դոնալդ Թրամփի փեսա Ջարեդ Քուշների հետ՝ Նյու Յորքում ՄԱԿ-ի Գլխավոր ասամբլեայի շրջանակում։ Այս մասին հայտնել է Վլադիմիր Զելենսկին։ Գրում է ՏԱՍՍ-ը:
Նրա խոսքով՝ բանակցությունները տեղի են ունեցել Թրամփի հետ իր հանդիպումից հետո։
«Տեղի է ունեցել մեր բանակցային խմբի և նախագահ Թրամփի բանակցային խմբի հանդիպումը։ Մենք քննարկել ենք բոլոր այն հարցերը, որոնք նախանշել էինք նախագահ Թրամփի հետ», — լրագրողներին ասել է նա։ Տեսանյութը հրապարակել է ուկրաինական «Новости Live» լրատվամիջոցը։
Նրա պնդմամբ՝ ամերիկյան կողմը «մի քանի շաբաթ է վերցնում» ռուսական կողմի հետ բանակցություններ անցկացնելու համար։
Ուիթքոֆը և Քուշները սեպտեմբերի 5-ին այցելել էին Մոսկվա, որտեղ նրանց ընդունել էր Ռուսաստանի նախագահ Վլադիմիր Պուտինը։ Հաջորդ օրը նրանք Կիևում հանդիպել էին Զելենսկու հետ։
Ինչպես հայտնել էր Ռուսաստանի նախագահի օգնական Յուրի Ուշակովը, Պուտինն ու Թրամփը սեպտեմբերի 8-ին հեռախոսազրույց էին ունեցել։
Սեպտեմբերի 23-ին ՌԴ ԱԳ նախարար Սերգեյ Լավրովը ՄԱԿ-ի Անվտանգության խորհրդի՝ Ուկրաինային նվիրված նիստում նշել էր, որ Ուիթքոֆն ու Քուշները Մոսկվա կատարած վերջին այցի ընթացքում հաստատել են ԱՄՆ-ի շահագրգռվածությունը ուկրաինական հակամարտության կարգավորման հարցում։
