Երևանի ավագանու ըննդիմադիր անդամ Սարգիս Տեր-Եսայանի ծեծի գործը հետաքննության փուլում է, մեղադրյալներ չկան։ «Փաստինֆո»-ի հաղորդմամբ՝ այդ մասին ասել է Տեր-Եսայանը՝ ճեպազրույցի ժամանակ։
Նա նշել է, որ միայն ինքն է տուժող ճանաչվել, սակայն տեղյակ չէ, թե մյուս կողմը հարցաքննվել է, թե ոչ։ Առերեսում չի եղել, իսկ իրեն մեկ անգամ են կանչել հարցաքննության։
«Իմ կարծիքով՝ ծածկադմփոց կանեն, քանի որ մեղադրյալները լինելու են իշխանական ներկայացուցիչներ։ Պարզ է, որ ինչ-որ մի ձև կհետաձգեն, կձգձգեն ու կփակեն գործը։ Իրենք սադրել էին, շիշ էին շպրտել։ Ի՞նչ ձև է դա, շիշ շպրտում են, որ հանդարտեցնե՞ն։ Կարող է ձեռքին երկաթյա մեծ դանակ էր, պետք է դա շպրտե՞ր մեր վրա։ Աֆղանստանում չենք, որ ավտոմատներով գան ավագանու նիստին։ Իրենց կողմից դա արդեն իսկ սադրանք է, որ մեզ հանեն հունից, որպեսզի մենք մտնենք իրենց հետ կռվի մեջ»,- ասել է ավագանու անդամը։
Տեր-Եսայանի խոսքով՝ ինքը դատաբժշկական փորձաքննություն է անցել և քթի հատվածում կոտրվածք ունի։ Նա հավելել է, որ հիմնական մեղավոր է համարում քաղաքային իշխանությանը։
«Այսինքն՝ եթե հենց իշխանությունը պատրաստ է այս սադրանքներին, ու սա նախադեպային չլինելու համար պետք է մեղավորները պատժվեին։ Մենք, սակայն, տեսանք, որ մեղավորները, նաև այդ ծեծկռտուքի մասնակիցները, որոնք չպատժվեցին, անգամ նկատողություն չստացան։ Նրանք անգամ պետք է աշխատանքից հեռացվեին, բայց փոխարենը խրախուսանք ստացան՝ ամառային արձակուրդ, պարգևավճար»,- ասել է նա։
Հիշեցնենք՝ ավագանու նիստի ժամանակ իրավիճակը լարվել էր։ Ավագանու անդամները սկսել են փոխադարձ վիրավորանքներ հնչեցնել, լեզվակռվբի բռնել, ինչը թեժացել է և դարձել ծեծկռտուք։
