Ինչպես օգոստոսի 14-ին մամուլի ասուլիսի ժամանակ հայտնել է ՆԳ նախարարության Միգրացիայի և քաղաքացիության ծառայության պետի պաշտոնակատար Նելլի Դավթյանը, ԵԱՏՄ երկրների քաղաքացիներն ազատված են վիզա կամ որևէ կարգավիճակ ստանալու անհրաժեշտությունից, բավական է աշխատանքի վերաբերյալ տեղեկանքը։ Առկա տվյալներով՝ առաջին կիսամյակում Հայաստանում աշխատել է ԵԱՏՄ երկրների 2 937 քաղաքացի, ինչն ավելի է նախորդ տարվա ցուցանիշից՝ շուրջ 2 500։

Ծառայության տվյալներով՝ նշված ժամանակահատվածում գրանցվել է դրական սալդո՝ երկիր մուտք է գործել 1 347 քաղաքացիով ավելի, քան դուրս է եկել։ Հայաստան մուտք է գործել 871 409 Հայաստանի քաղաքացի։ Անցյալ և նախանցյալ տարիներին առաջին կիսամյակում տարբերությունը բացասական էր և գերազանցում էր 20 հազարը։ Նույն ժամանակահատվածում սահմանը հատել է 57 953 օտարերկրացի։

Ժամանակավոր բնակության կարգավիճակ է խնդրել 9 534 քաղաքացի, ավելի քան 6 հազար դիմում բավարարվել է։ Նախորդ տարիների համեմատ երկու ցուցանիշն էլ եռապատկվել է։ Մշտական բնակության կարգավիճակ է ստացել 2 085 քաղաքացի, ինչը զգալիորեն ավելի է նախորդ տարիների ցուցանիշներից։ Ստացվել է ապաստան տրամադրելու 358 դիմում, բավարարվել է 94-ը։ Դեպքերի գրեթե կեսում մերժում է տրվել։