«Իմ խորին համոզմամբ՝ բարեկիրթ կամ լինում են, կամ չեն լինում։ Մարդ չի կարող այստեղ լինել բարեկիրթ, իսկ սրանից դուրս՝ չլինել բարեկիրթ։
Երբ դուք ապօրինի կերպով սահմանափակում եք, օրինակ, հորս արտերկիր մեկնելը, դրանից անմիջապես հետո ԱԱԾ-ի տեսախցիկի նկարածը րոպեների ընթացքում հայտնվում է իշխանական մամուլում, ու սրա շուրջ ինչ-որ մարդիկ, որոնք նաև այսօր այստեղ են գտնվում, սկսում են ամենալկտի ձևով գրառումներ անել։ Սրա պատասխանը ուրիշ տեղ, ուրիշ հարթությունում մի օր տրվելու է, բայց սա բարեկրթությունից բացարձակ հեռու է։
Եթե ուզում եք լինել բարեկիրթ, դա միայն այս ամբիոնում չպետք է լինի։ Դա պետք է լինի և Facebook-ում, և այս դահլիճից դուրս, և ամենուրեք։ Ընդհանրապես, այս բարեկրթության հարցը մի հատ տեսեք՝ 2018 թվականից հետո դեպքերն ինչպես զարգացան, ինչ կարգի բաներ թույլ տրվեցին մարդկանց հասցեին, ինչ կարգի արտահայտություններ ու լկտիություններ եղան։ Եվ այս ամեն ինչից հետո գալ այստեղ ու խոսել բարեկրթությունից՝ կարծում եմ՝ առնվազն ազնիվ չէ։
Ալխաս Ղազարյանն, օրինակ, ասում էր․ «Երբ մենք խոսում ենք ընտրություններ կեղծելուց, ամենացնցող բանը, իհարկե, «Բարգավաճ Հայաստանի» մանդատները կոնկրետ գողանալն է եղել»։ Ասում է․ «Լավ, ժողովուրդ, մեզ մեղադրում եք, որ ընտրություն ենք կեղծել, բայց 49 տոկոս ենք տարել։ Ասում եք՝ 50-ից ավել չեք տարել։ Դե եթե կեղծող էինք, մի քիչ էլ ավել կկեղծեինք, 50 կլինեինք»։
Դուք Հայաստանի 30 տարվա գրեթե բոլոր ընտրությունները համարում եք կեղծված, եթե չեմ սխալվում։ Օրինակ՝ 2003 թվականի ընտրություններին հայրս 49 տոկոս ձայն էր տարել Ստեփան Դեմիրճյանի հետ։ Հիմա այս նույն տրամաբանությունը մի դեպքում աշխատում է, մյուս դեպքում չի աշխատում։ Ո՞նց է էլի»,- այս մասին ԱԺ իր ելույթում ասաց «Հայաստան» խմբակցության պատգամավոր Լևոն Քոչարյանը։
Մանրամասն՝ տեսանյութում։
