ԱՄՆ-ն քննարկում է իր ռազմակայանների մի մասի տեղափոխման հնարավորությունը Քուվեյթից և Սաուդյան Արաբիայից՝ Մերձավոր Արևելքում նոր ռազմական գործողությունների դեպքում իրանական հարձակումների նկատմամբ խոցելիությունը նվազեցնելու համար, հայտնել է Wall Sreet Journal թերթը՝ հղում կատարելով քննարկումների ընթացքին ծանոթ ամերիկացի պաշտոնյաներին։
«ԱՄՆ ռազմական ղեկավարությունը ներկայում դիտարկում է Բահրեյնում բազայի արդիականացման, Քուվեյթում և Սաուդյան Արաբիայում ամերիկյան ներկայության կրճատման, ինչպես նաև որոշ բազաների կամ դրանց գործառույթների արևմուտք տեղափոխման հնարավորությունը՝ իրանական հրթիռների և անօդաչուների գործողության գոտուց ավելի հեռու»,- նշվել է հրապարակման մեջ։
Մասնավորապես, խոսքը վերաբերում է Բահրեյնում ԱՄՆ ռազմածովային բազային, որը, ինչպես գրել է WSJ-ն, Իրանի դեմ գործողության մեկնարկից ի վեր բազմիցս ենթարկվել է հարվածների։ Թերթի պնդմամբ՝ այդ հարձակումները հանգեցրել են լուրջ ավերածությունների, որոնց մասին Պենտագոնը հրապարակայնորեն չի հայտնել։
Աղբյուրներից մեկի պնդմամբ՝ ԱՄՆ-ը կարող է հրաժարվել վնասված օբյեկտների մի մասի վերականգնումից։ Փոխարենը որոշ հրամանատարական կենտրոններ կարող են տեղափոխվել ստորգետնյա հատվածներ, իսկ ռազմական ենթակառուցվածքը՝ ավելի հավասարաչափ բաշխվել տարածաշրջանում։ Ընդ որում, վերջնական որոշումներ առայժմ չեն ընդունվել։
Ամերիկյան ուժերի տեղակայման հնարավոր վայրերից մեկը դիտարկվում է Իսրայելը, որտեղ Իրանի դեմ ռազմական գործողության ընթացքում արդեն գտնվել են տասնյակ ամերիկյան ինքնաթիռներ, այդ թվում՝ կործանիչներ և լիցքավորող ինքնաթիռներ, նշվել է նյութում։
