Իրանը և ԱՄՆ-ն ստորագրել են նախնական խաղաղության համաձայնագիր, հաստատել են ԱՄՆ նախագահ Դոնալդը Թրամփը և Իրանի արտաքին գործերի նախարարությունը։ Հաղորդում է BBC.com-ը:
60 օր ժամկետով փոխըմբռնման հուշագիրը նախատեսում է ռազմական գործողությունների դադարեցում բոլոր ճակատներում, այդ թվում՝ Լիբանանում, Թեհրանի նկատմամբ կիրառվող պատժամիջոցների վերացում և Իրանի վերականգնման հիմնադրամի ստեղծում։
«Այն ստորագրված է։ Ստորագրված է Վերսալում։ Ես հենց նոր ստորագրեցի այն», — հայտարարել է Թրամփը՝ Մակրոնի հետ հանդիպումից հետո, որը տեղի է ունեցել Palace of Versailles-ում։ Միաժամանակ Թրամփը հերթական անգամ սպառնացել է վերսկսել հարձակումները, եթե Իրանը չկատարի իր ստանձնած պարտավորությունները։
Հուշագրի տակ իր ստորագրությունն է դրել նաև Իրանի նախագահ Մասուդ Փեզեշքիանը։
ԱՄՆ-ի և Իսրայելի կողմից փետրվարի 28-ին սկսված պատերազմը հազարավոր զոհերի պատճառ է դարձել, հիմնականում Իրանում և Լիբանանում։ Ի պատասխան՝ Թեհրանը հարվածներ է հասցրել Իսրայելին և ԱՄՆ-ի դաշնակիցներին Պարսից ծոցում։
Հակամարտությունը նաև լայնածավալ էներգետիկ ճգնաժամ է առաջացրել, քանի որ Իրանը փաստացի փակել էր Հորմուզի նեղուցը։
Չորեքշաբթի ԱՄՆ վարչակազմի ներկայացուցիչները լրագրողների համար ճեպազրույց են կազմակերպել «Մեծ յոթնյակի» հանդիպման ընթացքում և ներկայացրել հուշագրի 14 կետերից բաղկացած տեքստը։
Համաձայնագիրը ևս 60 օրով երկարաձգում է ապրիլին հայտարարված հրադադարը՝ կողմերին հնարավորություն տալով բանակցել վերջնական խաղաղ համաձայնագրի շուրջ։
Թե՛ Թրամփը, թե՛ նրա վարչակազմի անդամները ընդգծում են, որ առայժմ սա միայն փոխըմբռնման հուշագիր է, և դրա դրույթները կիրականացվեն միայն այն դեպքում, եթե Իրանը, նրանց ձևակերպմամբ, «պատշաճ կերպով կատարի իր պարտավորությունները»։
