Լիբանանի առողջապահության նախարարությունը հայտնել է, որ մարտի 2-ից ի վեր երկրի տարածքին հասցված իսրայելական հարվածների հետևանքով զոհվել է առնվազն 3 593 մարդ, ևս 10 990-ը վիրավորվել է։ Թարմացված տվյալները հրապարակվել են շաբաթ օրը, հաղորդել է CNN-ը։
Ավելի վաղ նույն օրը լիբանանյան բանակը հայտնել էր, որ երկրի հարավում ռազմական ավտոմեքենայի վրա իսրայելական հարվածի հետևանքով զոհվել են մի քանի զինծառայողներ, այդ թվում՝ բարձրաստիճան սպա։
Դեպքերը տեղի են ունենում շարունակվող ռազմական լարվածության ֆոնին՝ չնայած ԱՄՆ միջնորդությամբ Իսրայելի և Լիբանանի կառավարությունների միջև հայտարարված հրադադարին։
Միևնույն ժամանակ, շիական «Հեզբոլլահ» շարժումը համաձայնագրի կողմ չէ և հրաժարվում է պահպանել դրա պայմանները, քանի դեռ իսրայելական զորքերը մնում են Լիբանանի տարածքում։ Իսրայելում հայտարարում են, որ շարունակում են հարվածներ հասցնել երկրում «Հեզբոլլահի» օբյեկտներին և դիրքերին։
