«Փորձեցի հիշել մեր վերջին հանդիպումը․ 2021 թվականին էր՝ հինգ տարի առաջ։ Գիտեք, այն ժամանակ մի կողմից ավելի հեշտ էր, մյուս կողմից՝ ավելի դժվար։ Դժվար էր, որովհետև այս իշխանությունը համարյա նույն բաներն էր ասում, ինչ մենք էինք ասում։ Եթե հիշում եք՝ դեօկուպացիա, Շուշի, Հադրութ, Ղարաբաղի ինքնորոշման իրավունքի համար պայքար և այլն, և այլն։ Խոսույթը շատ չէր տարբերվում։ Ուղղակի մենք ասում էինք, որ սրանք ի վիճակի չեն դա անել։ Սրանք պատերազմ են բերել, պարտվել են պատերազմում, և պարտության խորհրդանիշ դարձած մարդը պետք է լքի երկրի ղեկավարի պաշտոնը։
Հիշո՞ւմ եք՝ սա էր մեր խոսույթը։ Իսկ ինչ խոստացել են, արել են ճիշտ հակառակը։ Բոլոր առումներով։ Չի կատարվել ոչ մի խոստում։
Հիմա իմ հարցադրումը հետևյալն է․ ինչի՞ մասին են ընտրությունները ընդհանրապես։
Յուրաքանչյուր քաղաքական ուժ կամ առաջնորդ գալիս է, տալիս է խոստումներ, ներկայացնում է իր ծրագրերը և հինգ տարի անց պարտավոր է հաշվետու լինել՝ ինչ է արել, ինչ չի արել։ Պետք է Ա կետից հասնի Բ կետ։
Այս մարդիկ արել են բաներ, որոնք որևէ կապ չունեն իրենց ծրագրերի ու խոստումների հետ։ Եվ դա է պատճառը, որ այս քարոզարշավը վերածվել է ատելության, թշնամանքի, ուղղակի թույնի տարածման։ Ավելի տոքսիկ քաղաքական միավոր, որը մասնակցում է ընտրություններին, ես չեմ տեսել։ Եվ չեմ էլ մտածել, որ դա հնարավոր է», — այս մասին այսօր՝ հունիսի 2-ին, Բերդ համայնքում քաղաքացիների հետ հանդիպման ընթացքում հայտարարեց ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյանը։
Մանրամասն՝ տեսանյութում։
