Երբեք չեմ ուզել զբաղվել քաղաքականությամբ։ Երկիրը այնպիսի վիճակում հայտնվեց, որ այստեղ պետք էր ընտրություն անել՝ կամ թողնել ու գնալ, կամ մնալ ու պայքարել։ Այս մասին ինստագրամյան իր էջում կիսվել է «Հայաստան» դաշինքի անդամ Լևոն Քոչարյանը։
«Միևնույն է, սա է մերը, այստեղ է, սա է մեր հողը։ Այստեղ կա այն ջերմությունը, որը երբեք ոչ մի ուրիշ երկրում չես կարող ստանալ։ Այստեղ եմ մնացել, որովհետև սա է հիմա, սա է իմ երկիրը։ Այստեղ են հայերը ապրում, ի վերջո սա է հայկական հողը, որովհետև իրենց ցանկությունն է, որ այս հողը հայկական չլինի։
Իրենց ցանկությունն այն է, որ այստեղ իրենք լինեն որոշողը, և ի վերջո՝ հայ չմնա այստեղ։ Սա չի կարող ընդունելի լինել ոչ մեկի համար, ոչ մի իրեն հայ համարողի համար։
Փորձում են մեր թշնամուց կերտել բարեկամ, իսկ մեր բարեկամներից՝ թշնամի։
Իմ պատկերացրած լավ երկիրը, առաջին հերթին, անվտանգ երկիրն է, միասնական երկիրն է, որտեղ բարությունը և ջերմությունն են գերիշխում, որտեղ երիտասարդը կարող է տեսնել իր ապագան, իր ընտանիքի ապագան, իր երեխաների ապագան։
Իմ երազած երկիրը այն երկիրն է, որը չի ուրանում իր սեփական ինքնությունը՝ IT ոլորտից մինչև արդյունաբերություն և գյուղատնտեսություն։ Իսկապես շատ մեծ պոտենցիալ կա այստեղ, և երբ տեսնում ես, որ այդ ամեն ինչը չի օգտագործվում այնպես, ինչպես կարող էր, հասկանում ես, որ կարող ես դա ավելի լավ անել, ու չես կարող ուղղակի անտարբեր մնալ ու չփորձել»։
