Մերձավոր Արևելքում հակամարտության հետևանքով վնասվել է ավելի քան 80 էներգետիկ օբյեկտ, հայտարարել է Միջազգային էներգետիկ գործակալության (ՄԷԳ) ղեկավար Ֆաթիհ Բիրոլը։
Նրա խոսքով՝ ընդհանուր առմամբ վնասվել է էներգետիկ ենթակառուցվածքների 84 օբյեկտ, որոնցից 34-ը լուրջ կամ շատ լուրջ վնասներ են կրել։ Նա այս մասին հայտարարել է «Անադոլու» գործակալությանը տված հարցազրույցում։
Բիրոլը նշել է, որ Հորմուզի նեղուցի հնարավոր փակումը լուրջ սպառնալիք է ներկայացնում համաշխարհային էներգետիկ անվտանգության համար։ Նա հավելել է, որ օրական մոտ 13 միլիոն բարել նավթ է անցնում նեղուցով, մինչդեռ համաշխարհային պահանջարկը կազմում է մոտ 100 միլիոն բարել։
ՄԷԳ-ի ղեկավարը նաև հայտնել է, որ հակամարտության ընթացքում բնական գազի մատակարարումների կորուստները գնահատվում են մոտ 100 միլիարդ խորանարդ մետր։ Նրա խոսքով՝ նույնիսկ եթե նավագնացությունը արագ վերականգնվի, նավթի և գազի մատակարարումները պատերազմից առաջ եղած մակարդակին վերադարձնելը ժամանակ կպահանջի, իսկ վնասված օբյեկտներից մի քանիսի վերականգնումը կարող է տևել առնվազն երկու տարի։
Բիրոլը հավելել է, որ ներկայումս Պարսից ծոցում կա ավելի քան 200 նավթատար նավ և մոտ 10 հեղուկացված բնական գազ (LNG) տեղափոխող նավ։
