Եվրամիության անդամ երկրների արտաքին գործերի նախարարները քննարկում են Հորմուզի նեղուց ռազմական նավեր ուղարկելու հարցը, ինչի համար կարող է փոփոխվել Կարմիր ծովում իրականացվող եվրոպական Aspides ռազմածովային գործողության մանդատը։ Այս մասին ԵՄ արտաքին գործերի խորհրդի նիստին ժամանելիս հայտարարել է ԵՄ դիվանագիտության ղեկավար Կայա Կալլասը, հաղորդում է ՏԱՍՍ-ը:
«Գլխավոր թեման լինելու է այն հարցը, թե ինչպես ապահովել Հորմուզի նեղուցի բաց լինելը»,- նշել է նա։
«Եվրամիությունը տարածաշրջանում ունի առաքելություններ և գործողություններ, մենք ունենք Aspides-ը: Նախարարների հետ կքննարկենք այս առաքելության մանդատի ընդլայնման հնարավորությունը. հարցն այն է, թե արդյոք ԵՄ երկրները կցանկանան օգտագործել այդ ռազմական նավերը»,- ասել է Կալլասը՝ խոստովանելով, որ դա հեշտ չի լինի։
Հիշեցնենք, որ Aspides-ը Եվրոպական միության կողմից իրականացվող պաշտպանական ռազմածովային գործողություն է, որը մեկնարկել է 2024 թվականի փետրվարին։
