ՄԱԿ-ի Անվտանգության խորհուրդը պահանջել է, որ Իրանը դադարեցնի տարածաշրջանում ամերիկյան ռազմաբազաների վրա հարձակումները։ Միևնույն ժամանակ, փաստաթղթում նույնիսկ չեն հիշատակվում ԱՄՆ-ի և Իսրայելի գործողությունները։ Չինաստանն ու Ռուսաստանը ձեռնպահ են մնացել քվեարկությունից։
«Եթե այն կարդա միջազգային գործերից անտեղյակ մարդ, ապա նրա մոտ անխուսափելիորեն տպավորություն կստեղծվի, թե Թեհրանը սեփական կամքով և չարամտությամբ հրահրված հարձակում է գործել արաբական երկրների վրա։ Բուն Իրանի տարածքին հասցվող հարվածները, էլ չխոսելով նրանց մասին, ովքեր կանգնած են դրանց հետևում և իրականացնում են դրանք, փաստաթղթում ոչ թե չեն քննարկվում, այլ պարզապես շրջանցվում են»,- ասել է Նեբենզյան։
Դիվանագետը հավելել է, որ բանաձևը կարող է նույնիսկ մեկնաբանվել որպես թույլտվություն՝ շարունակելու ագրեսիան Իրանի դեմ։ Միևնույն ժամանակ, ԱՄՆ-ն ակտիվորեն օգտագործում է իր բազաները տարածաշրջանում ոչ թե պաշտպանական, այլ հարձակողական նպատակներով, ընդգծել է մշտական ներկայացուցիչը։
«Վաշինգտոնն իր ագրեսիվ գործողություններով, ըստ էության, պարզապես հարվածի տակ է դրել Ծոցի պետություններին։ Ընդունված բանաձևն ի վիճակի չէ հասնել խաղաղության Մերձավոր Արևելքի տարածաշրջանում։ Այն միայն կխորացնի տարաձայնությունները հիմնական խաղացողների միջև»,- նշել է նա։
