Իրանն այժմ նախագիծ է պատրաստում ԱՄՆ-ի հետ հնարավոր գործարքի վերաբերյալ, սակայն չի հաստատում տեղեկությունն ատոմի շուրջ ժամանակավոր գործարքի կնքման հնարավորության մասին։ Այս մասին հայտարարել է Իրանի ԱԳՆ պաշտոնական ներկայացուցիչ Իսմայիլ Բաղային, հայտնում է ՌԻԱ նովոստի-ն:
«Մենք այժմ գտնվում ենք մեր տեսակետների նախապատրաստման փուլում», — ասել է դիվանագետը ճեպազրույցի ժամանակ։
Նա նաև սպեկուլյացիա է անվանել ԱՄՆ-ի հետ բանակցությունների վերաբերյալ տարբեր տեղեկությունները։ Նրա խոսքով՝ Վաշինգտոնի հետ ժամանակավոր համաձայնագրի կնքման հնարավորության մասին պնդումները հիմնազուրկ են։
Հիշեցնենք, որ Թեհրանի և Վաշինգտոնի միջև իրանական միջուկային դոսյեի շուրջ բանակցությունները տեղի են ունեցել փետրվարի 17-ին Ժնևում՝ Օմանի դիվանագիտական ներկայացուցչությունում։ Իրանական պատվիրակությունը գլխավորել է արտաքին գործերի նախարար Աբբաս Արաղչին, ամերիկյանը՝ ԱՄՆ նախագահի հատուկ ներկայացուցիչ Սթիվ Ուիթքոֆֆը։ Արաղչին բանակցություններն անվանել է կառուցողական և լուրջ։ Նրա խոսքով՝ կողմերին հաջողվել է մշակել առանցքային սկզբունքներ, որոնց հիման վրա նրանք աշխատելու են գործարքի շուրջ։
ԱՄՆ-ի և Իրանի միջև հաջորդ բանակցությունները տեղի կունենան փետրվարի 26-ին Ժնևում, հայտնել է օմանյան կողմը, որը հանդես է գալիս որպես միջնորդ բանակցություններում։
