Եկել ենք մեծ սիրով, խոնարհաբար դիմավորելու Վեհափառ Հայրապետին ւ մեր աջակցությունը հայտնելու իրեն: Եկեղեցին վերջին շրջանում հալածանքների է ենթարկվում, որոշ իշխանավորներ, պետական մտածողությունից հեռու, շատ անգամ սահմանադրական կարգը խախտելով, փորձում են եկեղեցու ներքին գործերին միջամտել: Այս մասին Զվարթնոց օդանավակայանում լրագրողների հետ զրույցում ասաց Տեր Վրթանես քահանա Բաղալյանը` հիշեցնելով վերջին շրջանում սրբազանների կալանավորումը:
Տեր Վրթանեսի խոսքով` այս իրավիճակում Վեհափառ Հայրապետը կարողանում է եկեղեցին ղեկավարել` չիջնելով հակաեկեղեցականների փողոցային մակարդակին:
«Տեսնում ենք, որ որոշ եկեղեցիներում ոմանք ինքնիրավչությամբ են զբաղվում, պետական որոշ պաշտոնյաներ դարձել են շարքային շոու կազմակերպողներ, իրենց պարտականություններից դուրս ոչ նորմալ ծառայություն են իրականացնում»,- նշեց Տեր Վրթանեսը:Անդրադառնալով Փաշինյանի պնդումներին, թե որպես հավատացյալ փորձում են բարեփոխել եկեղեցին ` Տեր Վրթանեսը նշեց, որ եթե ցանկանում է բարեփոխել եկեղեցին, թող իրենից սկսի, հետո իր ընտանիքի անդամներից, զբաղվիիր զավակների դաստիարակությամբ, իր կնոջ հետ օրինական պսակվի, եթե պատարագների էլ գնում է, ապա պետք է այնպիսի պատարագների գնա, որոնք կանոնական են:
« Իր գերնպատակն իրեն նվիրված ծափերն են. «վարչապետ» գոչյունները, իր նպատակը ոչ թե եկեղեցին բարեփոխելն է, այլ` պառակտելը» Վեհափառ Հայրապետի անունը չտալով` պատարագը կանոնական չի լինում, որևէ մեկն իրավունք չունի Վեհափառի անունը կրճատել»,- նշեց Տեր Վրթանեսը:
Տեր Հայրը հիշեցրեց նաև ապօրինի գաղտնալսումները, բռնաճնշումները:
«Բարեփոխել իր մոտ չի ստացվում, լավագույն դեպքում կարող է չեզոքություն ցուցաբերել, որևէ մեկը իրեն չի ընտրել` եկեղեցու ներսի գործերին քիթ խոթելու համար: Նա շարքային հավատացյալին ոչ պատշաճ վիճակում է այսօր, հերձվածողի կարգավիճակում է»,- նշեց Տեր Վրթանեսը` հավելելով, որ լավագույն բանը, որ կարող է անել վարչապետը` հրաժարական տալն է:
