Քաղաքագետ Արա Պողսյանը գրում է․ «Շատերին թվում է, թե Թուրքիան Հայաստանի նկատմամբ առավելագույնը կիրառելու է «փափուկ ուժ» (soft power), այսինքն` մարդկանց սրտերը գրավելու միջոցով է իր ազդեցությունը հաստատելու Հայաստանում։
Հիմա առավել քան վստահ եմ, որ նրանք կիրառելու են ոչ թե «փափուկ ուժ» (soft power), այլ «սուր ուժ» (Sharp power), այսինքն` ակտիվ քայքայիչ տեղեկատվական, կրթական, բիզնես գործունեության միջոցով քայքայել երկրի դիմադրողականությունը և ձեռք բերել տոտալ վերահսկողության միջոցներ` լոգիստիկ փոխկապակցվածության, էներգետիկ փոխկապակցվածության, պարենային և ռեսուրսների փոխկապակցվածության միջոցով։
Նույնիսկ ճանապարհների ապաշրջափակումը Թուրքիան և Ադրբեջանը արդեն իսկ փորձում են դարձնել Հայաստանին ճնշման գործիք, իսկ ապագայում` «սուր ուժի» (sharp power) կարեւորագույն բաղադրիչ։
Հենց սկսեցի ուսումնասիրել «սուր ուժը» (Sharp power) միանգամից դրա դասական օրինակը նետվեց հրապարակ։
ԵՒ սա այն դեպքերից է, երբ համաձայն եմ «սուր ուժի» (Sharp Power) մասին Քրիստոֆեր Ուալքերի և Ջեսսիկա Լյուդվիգի բնորոշմանը. «սուր ուժը» (Sharp Power) արտահայտվում է մանիպուլյացիայի, տեղեկատվության ձևախեղման և հասարակության մեջ հակասական տրամադրություններ գեներացնելու միջոցով։
Սրա նպատակը հասարակության պառակտումն է, ինչը կհանգեցնի սեփական ուժերի նկատմամբ թերահավատության և արտաքին ագրեսիվ ազդակներին դիմադրելու կամքի բացակայության»։
