Վաղարշապատի ՏԻՄ ընտրությունների ընթացքում Պառլամենտարիզմի զարգացման միջազգային կենտրոնի գործադիր տնօրեն Գոհար Մելոյանը դիտորդական առաքելության ընթացքում արձանագրած խախտումները բաժանել է երկու խմբի՝ բովանդակային ու տեխնիկական։
Տեխնիկական խախտումներից են, օրինակ, տեղամասերից մեկից գիշերվա ընթացքում ուղիղ եթեր չի հեռարձակվել, մի տեղամասում քվեախուցը տեղադրված է եղել ցայտաղբյուրի մոտ, ինչը հնարավորություն էր տալիս ցայտաղբյուրից օգտվող մարդկանց հետևել քվեախցում իրականացվող քվեարկությանը։
Եղել է դեպք, երբ ՔՊ ցուցակում ընդգրկված ավագանու թեկնածուն ընտրատեղամասերից մեկում եղել է վստահված անձ։
«Եղել են ուղղորդման դեպքեր, նույն մեքենան տարբեր ընտրողների է բերել տեղամաս։ Այս պահի դրությամբ՝ ժամը 16։00-անց է, ընդհանուր գնահատական եթե տանք, իմ կարծիքով, տեղի չեն ունեցել այնպիսի խախտումներ, որոնք կարող են քվեարկության արդյունքները կասկածի տակ դնել։ Այս բոլոր խախտումներն մենք արձանագրել ենք։
Ունեցել ենք արձանագրված երկու դեպք, երբ հրապարակայնորեն ցույց են տվել իրենց ընտրած քվեաթերթիկը։ Դեպք է եղել, որ ցույց չի տվել քվեաթերթիկը, բայց հրապարակել է՝ ում է տալու իր ձայնը։ Նաև քվեաթերթիկը պատռելու դեպք եղավ, որից հետո հետ եկավ՝ ընտրելու ցանկությամբ։
Եղավ դեպք, որ ընտրությանը մասնակցող թեկնածուն նաև վստահված անձ է եղել», — ասաց Գոհար Մելոյանը։
Ամփոփելով՝ Գոհար Մելոյանն արձանագրեց․ «Այնպիսի ծավալի ընտրախախտումներ չեն եղել, որոնք ընտրության արդյունքները կարող են կասկածի տակ դնել»։
Մանրամասն՝ տեսանյութում։
