Բյուջեն, որը ներկայացրել է, կարող ենք վստահաբար կոչել «ձախողումների ամփոփման բյուջե»։ Այս մասին այսօր՝ նոյեմբերի 14-ին հայտարարեց ԱԺ «Հայաստան» խմբակցության պատգամավոր Արթուր Խաչատրյանը։
«Ունենք պետական պարտքի սրընթաց աճ: 2026 թվականին 6 տրիլիոնից անցնելու է պարտքը: Այս տարվա վերջին արդեն 15 միլիարդ դոլարից է անցնում: Եվ ով պարադոքս, իշխանության ներկայացուցիչները չեն էլ կարողանում նույնիսկ հաշվարկել, թե այդ պարտքը ինչ ազդեցություն ունի մեր տնտեսության վրա, որքան կլիներ տնտեսական աճը, եթե պարտքը լիներ սովորական միջին ինչ-որ մակարդակի վրա, որովհետև եթե 5, 5,2, 5,4% է աճը, այդ դեպքում առանց պարտքի հասկանում ենք, թե դա ինչ կարող է լինել», — նշեց նա:
Խաչատրյանն անդրադարձավ նաև միջին աշխատավրձի, անհուսալի վարկերի վերաբերյալ հարցերին, ինչպես նաև պաշտպանական ոլորտին հատկացվող բյուջեի նվազեցմանը՝ հիշեցնելով Փաշինյանի քաղաքական այն հայտարարությանը, թե «մենք մարտունակ բանակ չենք կառուցելու, մենք կառուցելու ենք պաշտպանունակ բանակ»։
«Հիշեցնեմ, որ 2020 թվականին պատերազմը սկսելուց մի քանի օր առաջ կառավարությունը հանրայնացրեց այսպես կոչված «Հայաստան-2050» վերափոխման ռազմավարություն, որտեղ հպարտորեն կառավարությունը խոստանում էր կերտել մեկ շնչի հաշվով աշխարհի ամենամարտունակ բանակը: Ինչ է նշանակում մեկ շնչի հաշվով՝ իհարկե գիտությանը, բնությանը և մարդկությանը հայտնի չեն, բայց ամեն դեպքում իրենք հպարտորեն մարտունակ բանակ էին խոստանում կառուցել, հիմա խոսում են պաշտպանունակ, որ հանկարծ որևէ մեկը չմտածի՝ բա որ եթե հանկարծ սահմանից մի քիչ այն կողմ մարտական գործողությունների մեջ ներգրավվի մեր բանակը: Օրինակ, Նիկոլ Փաշինյանը այլևս Ղազախստան կարող է բանակ չուղարկի: Հիշեցնեմ, թե ինչ փառահեղ օպերացիա կազմակերպեց, երբ ինքը ԵԱՏՄ-ի պաշտպանության խորհրդի նախագահն էր»,- ասաց նա:
Մանրամասն՝ տեսանյութում։
