Ի սկզբանե նախատեսված էր, որ Ադրբեջանով Ղազախստանից պետք է գա առաջին գնացքը, բայց դրանից հետո պարզվեց, որ Ադրբեջանը նման հնարավորություն տալիս է նաև ՌԴ-ից եկող գնացքներին, արդյունքում, հիմա ՌԴ-ից որոշակի ապրանքախմբերի Հայաստան արտահանելու վերաբերյալ հայտեր են գերներացվում։ Այս մասին կառավարության նիստից հետո լրագրողների հետ զրույցում ասաց Նիկոլ Փաշինյանը։
«Ըստ էության, ստացվում է, որ հոսքերը սկսում են վերադասավորվել՝ Ադրբեջանով Հայաստան հասնելու համար։ Մինչդեռ, ի սկզբանե նախատեսված Ղազախստանի ցորենով բեռնված շարժակազմը դեռ տեղ չի հասել։
Ենթադրում եմ, գուցե էլի շարժակազմեր լինեն Հայաստան եկող, նկատի ունեմ, որ իրավիճակն անընդհատ փոխվում է, քանի որ նորանոր հայտեր են առաջանում։
Հիմա պետք է հասկանալ, թե արդյո՞ք հակառակ ուղղությամբ ապրանքներն ինչպես են հոսելու։ Այսինքն, Հայաստանից՝ Վրաստանով, Ադրբեջանով դեպի Ռուսաստան կամ Ղազախստան կամ այլ երկրներ։ Համոզված եմ, որ հընթացս հանրությունը այդ մասին կտեղեկանա։
Ես կարծում եմ, որ մեծ ու կարևոր իրադարձություն է տեղի ունեցել, պետք է իմ գոհունակությունն հայտնեմ ու հայտնեմ նաև մեր պատրաստակամությունը Մարգարա- Կոռնիձոր, և հակառակ երթուղով ապահովել թուրքական և ադրբեջանական բեռնատարների անցումը Թուրքիայից Ադրբեջան և Ադրբեջանից Թուրքիա»,-ասաց Փաշինյանը։
