«Խախտումները ՔՊ-ին է բնորոշ, խախտումները, ճնշումները, դրանք նոր չեն սկսել։ Արդեն երկու ամիս է, որ բարեկամներին, հարազատներին աշխատանքներից ազատում են, ազատման դիմում գրելու հորդորով են հանդես գալիս, եթե դիմումը չի գրում, պարզապես հրամանով ազատում են։ Վերջերս տեսանք Մաշտոցի անվան դպրոցի տնօրենի դեպքը․ ասել էին ազատման դիմում գրի, չէր գրել, պարզապես հրամանով ազատեցին աշխատանքից։ Այսպիսի դեպքերը շատ-շատ են, երկու ամսից ավելի է՝ շարունակվում է, արդեն հասել են հեռու բարեկամներին, ազգականներին, ընկերներին, հարևաններին»,- լրագրողների հետ զրույցում ասաց «Հաղթանակ» դաշինքի կողմից Վաղարշապատի համայնքապետի թեկնածու Սևակ Խաչատրյանը։ «Չեմ ուզում զոհի տպավորությւոն ստեղծել, դա մեզ ոչ վախեցնում է, ոչ գործից ու նպատակներից հետ պահում, հակառակը, շատ ավելի է ուժեղացնում և մոտեցնում մեր վերջնական նպատակին»,- ասաց նա։
Հարցին, թե Գյումրու ու Փարաքարի դեպքերը ցույց չե՞ն տալիս, որ եթե ընտրվի ընդդիմադիր համայնքապետ, իշխանությունը չի հաշտվելու, քայլերի կդիմի, կձերբակալի, Սևակ Խաչատրյանը պատասխանեց․ «Մենք հաստատակամ, ենք մեր գործողությունների մեջ։ Այսօրվա իշխանություններից ամեն ինչ կարելի է սպասել, ամեն ստորություն, ամեն ճղճիմ քայլ։ Դա իրենց աշխատաոճն է, բայց մենք դրանից չենք վախենում, եթե բոլորը վախենան, ուրեմն պետք է չլինի պայքար, պետք է բոլորը լռեն, իսկ մենք էդ տեսակը չենք»։
Արձագանքելով իշխանականների խոսքերին, թե՝ Վաղարշապատում «Գյումրի 2» թույլ չեն տալու, Սևակ Խաչատրյանն ասաց․ «Դա միակ դեպքն է, որ ՔՊ-ի հետ համաձայն ենք, իհարկե՝ Գյումրի 2 չի լինելու, մենք գնում ենք բացարձակ հաղթանակի, լինելու է Փարաքար 2՝ ընտրական մասով»։
Ինչ վերաբերում է եկեղեցու դեմ իշխանության ոտնձգություններին, Սևակ Խաչատրյանն այսպես արձագանքեց․ «Ցանկացած ոտնձգություն դեպի եկեղեցին, հակազդեցություն է ունենալու իմ, իմ թիմի, իմ ընկերների իմ շրջապատի կողմից, ինչը նախկինում ևս եղել է»։
Հիշեցնենք, որ «Հաղթանակ» դաշինքը այսօր՝ հոկտեմբերի 22-ին ներկայացնում էր նոյեմբերի 16-ին կայանալիք համայնքի ղեկավարի ընտրություններում իր նախընտրական ծրագիրը։
Մանրամասն՝ տեսանյութում։
