Հակակոռուպցիոն դատարանում՝ գործարար Սամվել Կարապետյանի կալանքը երկարաձգելու միջնորդության քննության` շուրջ 10 ժամ տևած դատական նիստը հետաձգվեց: Այն կշարունակվի արդեն այսօր` հոկտեմբերի 15-ին, ժամը 15.00-ին Հակակոռուպցիոն դատարանում՝ Երևան, Թբիլիսյան խճուղի 3/9:
Հիշեցնենք, որ կալանքը երկարաձգելու քննությունը սկսվել էր հոկետեմբերի 14-ին ժամը 18։00-ին։ Դատավորն է Վահե Դոլմազյանը։
Հիշեցնենք, որ Կարապետյանի նկատմամբ հետապնդումները սկսվեցին հունիսի 17-ին երբ նա հարցազրույցում ի պաշտպանության եկեղեցու հայտարարություն էր արել. «Ես միշտ եղել եմ հայոց եկեղեցու կողքին ու հայ ժողովրդի կողքին։ Եթե քաղաքական գործիչներին չհաջողվի, ուրեմն մենք էլ մեր ձևով ենք մասնակցելու այդ ամեն ինչին»։
Երևանի ընդհանուր իրավասության քրեական դատարանի որոշմամբ հունիսի 18- ին Սամվել Կարապետյանը կալանավորվեց երկու մասով։ Օգոստոսի 15-ին Սամվել Կարապետյանի կալանքի ժամկետը 2 ամսով երկարաձգվեց։ Դատարանն արձանագրել էր, որ նրան մեղսագրվող տնտեսական բնույթի արարքների վերաբերյալ հաղթահարված չէ նույնիսկ հիմնավոր կասկածը: Բայց միաժամանակ հաստատված էր համարել մեղադրանքի այն մասը, որը Կարապետյանի՝ Մայր Աթոռը պաշտպանող հարցազրույցը որակել է որպես կոչ»
Ըստ մեղադրաքի, Սամվել Կարապետյանը զանգվածային լրատվության միջոցով հարցազրույց տալու ընթացքում հնչեցրել է կառավարության լիազորություններին տիրանալուն ուղղված հրապարակային կոչ:
