Վանաձորի Տարոն 3 ՔՇՀ 7 շենքի բնակիչները դժգոհում են քայքայված տանիքից: 1991թ․-ին շահագործված շենքի խնդիրները հիմնականում կախված են հենց տանիքի հետ: Առաջացած ճեղքերի պատճառով ջուրը հոսում է մինչև առաջին հարկ: Խնդիրը փոքր-ինչ մեղմելու համար բնակիչները ժամանակավոր ամենահեշտ, բայց ոչ ժամանակակից լուծումն են գտել՝ տանիքում մեծ թասեր ու տարաներ են դրել, որ անձրևաջրերը դրանց մեջ թափվեն: Այս տարիների ընթացքում բազմաթիվ դիմումներ են ուղղել պատկան մարմիններին, բայց ապարդյուն:
Փյունիկ համատիրության նախագահ Տիգրան Հարությունյանն ասում է, որ նմանատիպ 1 շենքի տանիք կառուցելու համար միայն նյութածախսը կազմում է 1 մլն 300 հազար դրամ։ Սակայն ըստ համատիրության նախագահի, այդ շենքի հաշվեհամարին այս պահի դրությամբ 159 հազար դրամ կա ընդամենը, որը շատ քիչ է տանիք վերանորոգելու համար:
Բնակիչներն էլ հակառակն են պնդում, թե անգամ ծանր սոցիալական վիճակում գտնվող ընտանիքներն են բարեխղճորեն կատարում վճարումները: Ավելին ամռանը խոստացել են հավելյալ վճարի դիմաց ներանորոգել տանիքը: Յուրաքանչյուր ընտանիք 40 հազարական դրամ է ներդրել՝ փոխանցվելով համատիրության վարձավճարների հավաքագրման հաշվեհամարին:
Ու մինչ բնակիչներն ու համատիրության ղեկավարը փորձում են լուծում գտնել, շենքի ճաքերն օր-օրի ավելանում են՝ նորանոր խնդիրներ առաջ բերելով բնակիչների համար:
Մանրամասն՝ տեսանյութում։
