Գազայի առողջապահության նախարարությունը հայտնել է, որ վերջին 24 ժամվա ընթացքում Իսրայելի կողմից իրականացված հարվածների հետևանքով զոհվել է 59 պաղեստինցի, վիրավորվել է ևս 224-ը։ Այսպիսով՝ Գազայի հատվածում ընդհանուր զոհերի թիվը պատերազմի ընթացքում գերազանցել է 63 հազարը։
«Արմենպրես»-ի փոխանցմամբ՝ այս մասին հայտնում է Al Jazeera-ն։
Միևնույն ժամանակ նախարարությունը հայտարարել է վերջին 24 ժամվա ընթացքում սովից և թերսնումից ևս 5 մարդու մահվան մասին։ Այսպիսով՝ սովի և թերսնման զոհերի թիվը հասել է 322-ի, որոնց թվում 121-ը երեխաներ են։
Թուրքիայի արտաքին գործերի նախարար Հաքան Ֆիդանը հայտարարել է, որ Իսրայելը զանգվածային կոտորածներ է իրականացնում պաղեստինցիների դեմ Գազայի հատվածում։
«Մեր ջանքերը շարունակվում են Կատարի և Եգիպտոսի հետ՝ պաղեստինյան հարցի լուծում գտնելու համար»,- նշել է նա։
Իսրայելի վարչապետ Բենիամին Նեթանյահուի գրասենյակը հայտնել է, որ Իսրայելի պաշտպանության ուժերն անվտանգության ծառայության հետ համատեղ Գազայի հատվածից վերադարձրել են երկու պատանդների մարմինները։
Գազայի առողջապահության նախարարությունը տեղեկացրել է, որ 2023 թվականի հոկտեմբերի 7-ից վեր իսրայելական հարձակումների հետևանքով զոհված պաղեստինցիների թիվը հասել է 63025 հազարի, վիրավորվել է 159490 մարդ, որոնց թվում զգալի թիվ են կազմում կանայք և երեխաները։
Իսրայելը Գազայի հատվածում ռազմական գործողություններ էր սկսել՝ ի պատասխան պաղեստինյան ՀԱՄԱՍ շարժման զինյալների ներխուժման, որի հետևանքով զոհվել էր գրեթե 1200 մարդ, գերեվարվել՝ շուրջ 250 մարդ։
