Իրանի Գերագույն առաջնորդի ներկայացուցիչ Աբդոլռահիմ Սարային հայտարարել է, որ սիոնիստական ռեժիմի լայնածավալ ներկայությունն ու ազդեցությունն Ադրբեջանում լրջագույն անվտանգության սպառնալիք է Իրանի համար, հաղորդում է իրանական Tasnim գործակալությունը։
«Սիոնիստական ռեժիմը մեծ ազդեցություն ունի Ադրբեջանում և մեր սահմանից 17 կիլոմետր հեռավորության վրա Խուդաֆերինում մեծ օդանավակայան է կառուցել, և մենք ականատես ենք լինում այդ օդանավակայանների և Թել Ավիվի միջև ամենօրյա չվերթների։ Դա ցույց է տալիս Ադրբեջանի նկատմամբ սիոնիստական ռեժիմի լիակատար գերիշխանությունը։ Սիոնիստական ռեժիմի ներկայությունն Ադրբեջանում մեծացրել է անկայունությունը տարածաշրջանում և լուրջ սպառնալիք է հարևան երկրների համար»,- նշել է Աբդոլռահիմ Սարային։
Իրանի Գերագույն առաջնորդի ներկայացուցիչը պաշտոնյաներին և հանրությանը կոչ է արել ավելի մեծ ուշադրություն դարձնել այդ խնդրին։
«Իրանը միշտ հատուկ նշանակություն է տվել իր անվտանգության և տարածքային ամբողջականության պահպանմանը և դեմ է ցանկացած ապակառուցողական գործողության»,- եզրափակել է նա։
