Իրանն ունի հիմնավոր ապացույցներ, որ ԱՄՆ զորքերը աջակցում են Իսլամական Հանրապետության դեմ Իսրայելի ռեժիմի ռազմական հարձակումներին։ Tasnim լրատվական գործակալության փոխանցմամբ, ասել է արտգործնախարար Աբբաս Արաղչին՝ ԱՄՆ-ին կոչ անելով հետ կանգնել դրանից։
Կիրակի օրը Թեհրանում օտարերկրյա դեսպանների հետ հանդիպման ժամանակ Արաղչին վերահաստատել է Իրանի իրավունքը՝ պաշտպանվելու և հակահարված տալու Իսրայելի ռեժիմին, որը հունիսի 13-ից ի վեր հարձակվում է Իրանի միջուկային, ռազմական և քաղաքացիական թիրախների վրա։
Նա ընդգծել է, որ Իասրայելը չէր կարող ինքնուրույն ագրեսիայի ակտ իրականացնել առանց ԱՄՆ աջակցության։
Արաղչին ասել է, որ Իրանը ուշադիր հետևում է իրավիճակին և ունի անհերքելի ապացույցներ, որ ԱՄՆ զորքերը աջակցում են Իսրայելի հարձակումներին։
Արտաքին գործերի նախարարն ասել է, որ ապացույցներից ավելի կարևոր է ԱՄՆ նախագահ Դոնալդ Թրամփի հստակ աջակցությունը Իսրայելին՝ հավելելով. «ԱՄՆ-ն ներգրավված է Իսրայելի հարվածներում և պետք է պատասխանատվության ենթարկվի»։
«ԱՄՆ-ն պետք է հստակ դիրքորոշում արտահայտի և դատապարտի Իսրայելի հարձակումները Իրանի միջուկային օբյեկտների վրա»,-հավելել է Արաղչին՝ ասելով, որ Թեհրանը սպասում է, որ Վաշինգտոնը հետքայլ անի։
Արտաքին գործերի նախարարը նաև դատապարտել է ՄԱԿ-ի Անվտանգության խորհրդի անտարբերությունը Իսրայելի կողմից Իրանի դեմ ագրեսիայի փաստով։
Արաղչին ասել է, որ Իրանի հարձակումը ռազմական և տնտեսական թիրախների վրա ինքնապաշտպանական է և ագրեսիային հակազդելու միջոց։
Նա բացատրել է, որ Իրանը հրթիռային հարձակումների առաջին ալիքի ժամանակ թիրախավորել է Իսրայելի ռեժիմի ռազմական թիրախները, սակայն երբ սիոնիստական ռեժիմը հարձակման երկրորդ օրը սկսեց հարձակվել տնտեսական թիրախների վրա, Իրանը հակադարձեց և շաբաթ երեկոյան սկսեց հարվածել տնտեսական թիրախներին։
Հունիսի 13-ի գիշերը Իսրայելի պաշտպանության ուժերը (IDF) սկսեցին «Ծագող առյուծ» անվամբ լայնածավալ գործողություն, որի շրջանակներում ռազմաօդային ուժերը հարվածներ են հասցնում Իրանի միջուկային ծրագրի ռազմական թիրախներին և վայրերին։ Իրանի Իսլամական հեղափոխության պահապանների կորպուսը (IRGC) ավելի ուշ հայտարարեց, որ Իրանն իրականացնում է «Իրական խոստում 3» գործողությունը՝ ի պատասխան Իսրայելի հարվածների։
