Փաստաբան Արսեն Բաբայանը ֆեյսբուքյան իր էջում ներկայացրել է իշխանությունների կողմից ներկայացված թալանի վերադարձի մի օրինակ, ըստ որի, գյուղապետը մեղադրվում է նրա համար, որ անասնաբույժը չի լրացրել «տաբելը», այսինքն՝ ժամը 9-ից 6-ը չի եղել աշխատավայրում, փոխարենը Նիկոլ Փաշինյանն ու իր կինը մասնավոր ծրագրի համար պետական ուղղաթիռով են շրջում։
Ըստ գյուղապետի փաստաբան Արսեն Բաբայանի՝ նրա նկատմամբ քրեական վարույթ է հարուցվել, պահանջում են փոխհատուցել մեկ տարվա ընթացքում 1 մլն 200 հազար դրամ՝ պետությանը վնաս տալու համար։
Բաբայանը մանրամասնում է, որ անասնաբույժի աշխատանքի բնույթն այնպիսին է, որ նա պետք է այցելի գյուղացիների գոմեր, տեսնի, հետազոտի անասուններին։
«Գյուղում չի գտնվել գեթ մեկ մարդ, որը կդժգոհեր անասնաբույժի աշխատանքից։ Վկայությունները ցույց են տալիս, որ այդ համայնքում անասնապահությունն աճ է գրանցել, կենդանիների հիվանդության դեպքեր ընդհանրապես չեն գրանցվել։ Այս մարդն ամբողջությամբ իրականացրել է իր գործառույթները։ Հակակոռուպցիոն կոմիտեի պատկերացմամբ, անասնաբույժի աշխատանքը գրասենյակային է»,- մանրամասնեց նա։
Այս ամենին զուգահեռ, փաստաբանը նկատում է, որ Նիկոլ Փաշինյանը «Կրթվելը նորաձև է» նախաձեռնության շրջանակում կնոջ հետ պետական ուղղաթիռով մեկնել է Տաթև։
«Այս ծրագիրը վարչապետի տիկնոջ նախաձեռնությունն է, այսինքն՝ ծրագիրը մասնավոր, հասարակական գործունեությամբ պայմանավորված ծրագիր է, որը կարող է յուրաքանչյուր մարդ իրականացնել, դրանց հետ կապված պետական մասնակցություն չկա։ Բայց օգտագործվել է պետական ուղղաթիռը, վառելիքը, անձնակազմը և այլն, և այլն։ Հիմա դուք հաշվարկեք»,-ասաց Բաբայանը։
Մանրամասները՝ տեսանյութում։
