Վրաստանում ԱՄՆ դեսպանատունը մայիսի 7-ին հաղորդագրություն էր տարածել Թբիլիսիի 3 առևտրի կենտրոններում ռումբի սպառնալիքի մասին։
ԱՄՆ դեսպանատան հաղորդագրության մեջ նշվում է Թբիլիսիի երեք մոլերի՝ «East Point»-ի, «Galleria Tbilisi»-ի և «Tbilisi Shopping Area»-ի դեմ առկա ռումբի սպառնալիքի մասին և կոչ է արվում առաքելության բոլոր աշխատակիցներին «խուսափել այս վայրերից՝ մինչև հետագա ծանուցում»։
Արձագանքելով այս հաղորդագրությանը՝ Վրաստանի պետական անվտանգության ծառայությունը դիվանագիտական առաքելություններին կոչ է արել «հարգել անվտանգության համար պատասխանատու գերատեսչությունների գործունեությունը և զերծ մնալ համապատասխան գերատեսչությունների հետ չհամաձայնեցված հայտարարություններ տարածելուց»։
Ժամեր անց դեսպանատունը հետ է կանչել հնարավոր պայթուցիկ սարքերի մասին նախազգուշացումը։
«Վրացական իրավապահ մարմինները երեկ երեկոյան դեսպանատանը տեղեկացրել են , որ երեք առևտրի կենտրոններից որևէ մեկում պայթուցիկ սարքեր չեն հայտնաբերվել: Տարածաշրջանային անվտանգության վարչությունը հանել է դեսպանատան աշխատակիցներին այդ տարածքներից խուսափելու հանձնարարականը», — ասվում է հաղորդագրության մեջ:
