Երևանի Պուշկինի անվան թիվ 8 հիմնական դպրոցի աշակերտները դասադուլ են իրականացնում առավոտից. նրանք պահանջում են չեղարկել դպրոցի տնօրեն Նատալյա Ստեփանյանին աշխատանքից ազատելու որոշումը։
Նույն պահանջով աշակերտների ծնողները ստորագրահավաք են կազմակերպել։ Լրագրողների հետ զրույցում նրանք նշել են, որ մինչև որոշումը չչեղարկվի, աշակերտները դպրոց չեն գնալու։
«Պարոն Տիգրան Ավինյան, տիկին Ժաննա Անդրեասյան ձեզ հրավիրում եմ Պուշկինի անվան թիվ 8 հիմնական դպրոց, որովհետև այսօր իմ երեխայի իրավունքներն են խախտվել. մենք ուզում ենք պարզաբանումներ ստանալ, թե ինչու մեր դպրոցի տնօրեն Նատալյա Ստեփանյանին փակ քվեարկությամբ հեռացրին աշխատանքից»,- ասել է մայրերից մեկը։
Ծնողների խոսքով՝ 10 տարվա պաշտոնավարման տնօրենին առանց հիմքերի են ազատել աշխատանքից։ Նա մայիսի 3-ին է փայլուն հանձնել իր քննությունն ու վերանշանակմանն էր սպասում։
«Եթե տնօրենին հեռացնեն, երեխաներին կհանենք դպրոցից։ 14 տարի է այս դպրոցի ծնող եմ, մեկ օր նրա հետ կապված խնդիր չենք տեսել։ Ուսուցիչները բոլորը ազատման դիմում են գրել, ծնողներ կան՝ արդեն երեխաներին հանում են դպրոցից»,- հայտարարել է մեկ այլ աշակերտի ծնող։
