ՆԱՏՕ-ի գլխավոր քարտուղար Մարկ Ռյութեն հայտարարել է եվրոպական մի շարք երկրների պատրաստակամության մասին՝ զորքեր ուղարկել Ուկրաինա այն դեպքում, եթե Վլադիմիր Պուտինը հնարավոր հրադադարից հետո որոշի նորից հարձակվել։ «Որոշ եվրոպական երկրներ ազդակ են տվել, որ եթե դրա կարիքը լինի, ապա իրենք պատրաստ են զորքեր տրամադրել», — ասել է Ռյութեն Bild-ին տված հարցազրույցում։ Նրա խոսքով՝ ներկայումս աշխատանքներ են տարվում «Ցանկացողների կոալիցիայի» հայեցակարգի շուրջ, որը ներառում է ցամաքում, ծովում և օդում ուժերի հնարավոր տեղակայման մանրամասների մշակումը։
Ռյութեն պարզաբանել է, որ դաշնակիցները ձգտում են ստեղծել եռաստիճան զսպման համակարգ՝ ապահովելով, որ խաղաղության համաձայնագրից հետո Ուկրաինան այլևս երբեք չենթարկվի հարձակման: Առաջին մակարդակը ուժեղ ուկրաինական զինված ուժերն են, որոնք ունակ են ինքնուրույն պաշտպանել երկիրը: Երկրորդ մակարդակը «Ցանկացողների կոալիցիան» է, որը լրացուցիչ անվտանգության երաշխիքներ կապահովի: Երրորդ մակարդակը ԱՄՆ աջակցությունն է: «Մենք ներկայումս աշխատում ենք այս երեք տարրերը համատեղելու ուղղությամբ այնպես, որ Պուտինը հստակ հասկանա, որ նա այլևս երբեք չպետք է դիպչի Ուկրաինային»:
Դաշինքի գլխավոր քարտուղարը նաև հայտարարել է, որ չի ակնկալում Ուկրաինային ուղղված ամերիկյան աջակցության դադարեցում։ Հետախուզական տեղեկատվության փոխանակումը և Կիևին սպառազինության մատակարարումները ներկա պահին շարունակվում են, ասել է նա՝ նշելով, որ Հաագայի գագաթնաժողովում ԱՄՆ նախագահ Դոնալդ Թրամփը հաստատել է Ուկրաինայի հզորացմանն ուղղված հանձնառությունը։
