Փաշինյանը վստահեցրել է, որ 2026 թվականի ընտրությունների արդյունքում նոր մանդատ ստանալու դեպքում «ՔՊ»-ն կնախաձեռնի Հայաստանի համար ամբողջովին նոր Սահմանադրության ընդունումը, և իր կարծիքով՝ ժողովուրդը կողմ կքվեարկի այդ փոփոխությանը։ «Փաստինֆո»-ի փոխանցմամբ՝ այս մասին նա հայտարարել է Գերմանիայի Արտաքին հարաբերությունների գերմանական ընկերակցությունում կազմակերպված պանելային քննարկման ժամանակ։
«2018-ից մենք ներքաղաքական օրակարգում ունենք նոր Սահմանադրություն ընդունելու հարցը, և վերջերս մեր կուսակցության համագումարի հռչակագրում մենք հստակորեն նշել ենք, որ ժողովրդից նոր մանդատ ստանալուց հետո՝ 2026-ի ընտրություններից հետո, կնախաձեռնենք Հայաստանի համար ամբողջովին նոր Սահմանադրության ընդունումը։ Սա բացարձակապես ներքաղաքական թեմա է, մենք այն չենք քննարկում Ադրբեջանի հետ խաղաղության բանակցությունների շրջանակում։ Ես համոզված եմ, որ մեր ժողովուրդը կքվեարկի նոր Սահմանադրության օգտին»,- ասել է Փաշինյանը։
Վերջինս նաև հավելել է, որ երբ Ադրբեջանը բարձրացնում է Հայաստանի Սահմանադրությունը փոխելու հարցը՝ պնդելով, թե այնտեղ առկա են տարածքային պահանջներ Ադրբեջանի նկատմամբ, ապա Փաշինյանն իր թիմակիցների հետ պատրաստ է ապացուցելու, որ Հայաստանի Սահմանադրությունում որևէ տարածքային պահանջ չկա Ադրբեջանի հանդեպ։
«Մենք կարող ենք դա ապացուցել թե՛ դե յուրե, թե՛ գործնականում։ Հայաստանում նույնպես կան մեկնաբանություններ Ադրբեջանի սահմանադրության վերաբերյալ, ըստ որոնց՝ այնտեղ կարող են դիտվել տարածքային պահանջներ Հայաստանի նկատմամբ։ Ինչո՞ւ մենք այդ հարցը չենք բարձրացնում․ որովհետև խաղաղության և միջպետական հարաբերությունների հաստատման մասին համաձայնագրի տեքստում այդ խնդիրները կարգավորված են։
Եկեք պատկերացնենք, որ խաղաղության համաձայնագիրը ստորագրված է։ Դրանից հետո՝ մեր Սահմանադրության և օրենսդրության համաձայն, այն պետք է ուղարկվի Սահմանադրական դատարան՝ համապատասխանությունը ստուգելու համար։ Եթե ՍԴ-ն որոշի, որ այն լիարժեք համապատասխանում է մեր Սահմանադրությանը, ապա խոչընդոտ չկա դրա վավերացման համար, և վավերացվելուց հետո այն կստանա բարձրագույն իրավական ուժ մեր երկրում։
Ես հրապարակավ ասել եմ՝ եթե Սահմանադրական դատարանը որոշի, որ այն չի համապատասխանում մեր Սահմանադրությանը, ապա անձամբ ես կնախաձեռնեմ սահմանադրական փոփոխություններ։ Իրականում որևէ խնդիր չկա մեր Սահմանադրության մեջ»,- հայտարարել է նա։
