Այստեղ նստած «Քաղաքացիական պայմանագիր» խմբակցության ղեկավար Հայկ Կոնջորյանը, որի կինն աշխատում է «Հայփոստ»-ում, 2021-ին թվականին նրա տարեկան աշխատավարձը, ըստ հայտարարագրի, 6.8 միլիոն դրամ էր, այդ ժամանակ արդեն Հայկ Կոնջորյանը դարձավ ֆրակցիայի ղեկավար, 2022 թվականին նրա աշխատավարձը դարձավ 9.5 միլիոն դրամ, 2023 թվականին դարձավ 10.5 միլիոն դրամ, անցած տարի էլ Հայկ Կոնջորյանի կինը դարձավ «Հայփոստ»-ի տնօրեն։ Այս մասին, այսօր՝ մայիսի 13–ին, ԱԺ-ում Հակակոռուպցիոն կոմիտեի նախագահ Արթուր Նահապետյանի կողմից տարեկան հաշվետվության ներկայացման ժամանակ ասաց պատգամավոր Թագուհի Թովմասյանը:
«Այս թռիչքաձև աճը, արդյո՞ք որևէ աղերս ունի կոռուպցիոն որևէ գործարքի հետ, և եթե օրինակ Հայկ Կոնջորյանը չլիներ իշխող խմբակցության ղեկավար, արդյոք նրա կինն այս կարիերայի թռիչքը կունենար»,- հարցրեց պատգամավորը:
Չնայած հարցն ուղղված էր Նահապետյանին, սակայն դրան պատասխանեց նաև հենց ինքը՝ Կոնջորյանը։ «Թագուհի Թովմասյա՛ն, մամուլի հրապարակումների համաձայն, դուք 3 հատ տուն ունեք Երևանում: Որպես լրագրող՝ ո՞նց եք Երևան քաղաքում 3 հատ տուն ձեռք բերել… Ձեր՝ հատկապես ո՞ր լրագրողական ծառայության համար ի՞նչ վարձատրություն են տվել»,- ասաց նա։
Թովմասյանը ևս հարցն անպատասխան չթողեց․ «Երեք բնակարան ունեմ, չորրորդն էլ գնելու եմ։ Բոլոր բնակարանները ձեռք եմ բերել հիփոթեքով, ամեն բնակարանի համար վճարելով 10 և ավելի տարիներ: Վերջին հիփոթեքին դեռ 38 մլն դրամ ունեմ վճարելու:
Եթե Հայկ Կոնջորյանը լավ լրագրող լիներ, ինքն էլ կկարողանար ունենալ բնակարան: Ես, որպես թերթի հիմնադիր, գուցե իրեն էլ ընդունեի աշխատանքի, ինչպես իրենց ֆրակցիայից մի քանիսի և կստանար բարձր աշխատավարձ, ինչպես իրենց ֆրակցիայից մի քանիսը:
Ընդ որում, Հայկ Կոնջորյանն ասում է Թագուհի Թովմասյանն այդ բնակարանները ձեռք է բերել մինչև պատգամավոր դառնալը, այո, ոչ թե ձեր նման մանդատ եմ ստացել իշխանության եմ եկել, հետո տների տեր եմ դարձել, ես կայացած մարդ եմ եղել մինչև պատգամավոր դառնալը: Այնպես որ եթե Հայկ Կոնջորյանը լիներ պրոֆեսիոնալ աշխատակից նախորդ կյանքում՝ մինչև մանդատ ստանալը, մինչև երեք կուսակցություն փոխելը, մինչև իր քավորին դավաճանելը, ինքը կկարողանար ունենալ շատ ավելի այլ կյանք»:
