Փաշինյանն ասում է՝ վերջ, այլևս խաղաղություն է, թուղթ են ստորագրում, բայց պարզվում է՝ հիմնական սկզբունքների շուրջ համաձայնություն չկա։ Այս մասին ԱԺ-ում լրագրողների հետ զրույցում ասաց «Հայաստան» խմբակցության պատգամավոր Արթուր Խաչատրյանը։
«Հիշեցնեմ, որ երբ 2018-ին Փաշինյանը հասարակությանը մոլորեցնելով բանակցում էր Արցախյան հարցի վերաբերյալ՝ ասում էր, որ սրանք բանակցություններ չեն, ուղղակի հանդիպում ենք, խոսում ենք՝ հասկանանք, թե ամեն բառի տակ ինչ է հասկացվում, իսկ հիմա ստորագրում է մի փաստաթուղթ, որի հիմնական բառի շուրջ կան տարընթերցումներ, Ալիևը հասկանում է մի բան, ինքն ուրիշ բան, Թրամփը խոսում էր 99 տարով վարձակալության մասին, հետո ևս 99 տարով երկարաձգելու մասին։ Ինչի՞ վազեցին հապշտապ ինչ-որ թուղթ ստորագրեցին, հիմա էլ ի լուր աշխարհի ասում են՝ վերջ, մեր մոտ խաղաղություն է։
Ի՞նչ խաղաղություն, երբ դիմացինն Հայաստանի նկատմամբ անընդհատ պահանջներ է դնում, սպառնալիքներ է հնչեցնում ու հայ հասարակությանը վիրավորում»,- ասաց նա։
Անդրադառնալով Փաշինյանը հայտարարությանը, թե արցախցիների վերադարձն իրատեսական չէ, Խաչատրյանն ասաց, որ Փաշինյանը չի որոշում արցախցիների ճակատագիրը, արցախցիները իրենց իրավունքները չեն արտապատվիրակել Փաշինյանին։
«ՄԻԵԴ-ի 2 վճիռ կար, Չիրագովն ընդդեմ Հայաստանի և Շահումյանցիների բողոքն ընդդեմ Ադրբեջանցիների։ Հիմա, եթե մարդիկ դիմում ներկայացնեն, և ՄԻԵԴ-ը համանման որոշում կայացնի՝ Փաշինյանն ի՞նչ է անելու, սպառնալո՞ւ է, բանտարկելո՞ւ է, որ մարդիկ չվերադառնան, իրենց հարցը չբարձրացնե՞ն միջազգային ատյաններում»,-ասաց նա։
Մանրամասն՝ տեսանյութում։
