Փետրվարի 14-ին, արտառոց դեպք է տեղի ունեցել Երևանում։ ՀՀ Ներքին գործերի նախարարության ոստիկանության Պարեկային ծառայության Երևան քաղաքի գնդի 3-րդ գումարտակի 2-րդ վաշտի պարեկները ժամը 00։40-ի սահմաններում, Դերենիկ Դեմիրճյան փողոցում հեռահար լույսերով երթևեկելու համար կանգնեցրել են «Tesla» մակնիշի ավտոմեքենա, որի վարորդին՝ Երևանի բնակիչ 28-ամյա Հովհաննես Մ․-ին սթափության զննություն անցկացնելուց հետո պարզվել է, որ նա գտնվում է ոչ սթափ վիճակում:
Արձանագրություն կազմելու ժամանակ պարեկներին են մոտեցել 2 այլ քաղաքացիներ, ովքեր դրսևորելով ագրեսիվ և ոչ ադեկվատ վարքագիծ հնչեցրել են սեռական բնույթի հայհոյանքներ, խոչնդոտել են պարեկների ծառայությանը։
«Պարեկների կողմից օրինական պահանջ ներկայացնելուց, բազմաթիվ հորդորներից և ողջամիտ ժամանակ տրամադրելուց հետո նշված քաղաքացիները շարունակել են դրսևորել ագրեսիվ վարքագիծ, խախտելով հասարակական կարգը, հայհոյախառն արտահայություններ են հնչեցրել ոստիկանության ծառայողների հասցեին, որից հետո նշված քաղաքացիներին Դեմիրճյան փողոցից հասարակական վայրում ոչ սթափ երևալու, ոստիկանության ծառայողին վիրավորելու և խուլիգանություն կատարելու հիմնավոր կասկածի առկայության հիմքով ձերբակալել և տեղափոխել են ՀՀ ՆԳՆ ոստիկանության համայնքային ոստիկանության գլխավոր վարչության Արաբկիրի բաժին։
Պարզվել է, որ նրանք հանդիսանում են՝ Կոտայքի մարզի բնակիչ 33-ամյա Էդգար Խ․-ն և Երևանի բնակիչ 29-ամյա Վլադիմիր Խ․-ն։Դեպքի փաստով ոստիկանության Արաբկիրի բաժնում փաստաթղթեր են կազմվել, որոնք ձերբակալված անձանց հետ միասին ներկայացվել են ՀՀ Քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժին»,-հայտնում է shamshyan.com-ը։
