«Օգոստոսին մեր երկիրը օրերի գերաշռող մասում հիմնականում գտնվելու է հարավից ներթափանցող արևադարձային տաք օդային հոսանքների ազդեցության գոտում, ինչի արդյունքում ամսական միջին ջերմաստիճանը հանրապետությունում կանխատեսվել է կլիմայական նորմայից բարձր 2-3 աստիճանով, տեղումների քանակը նորմայից պակաս կլինի»,-  «Արմենպրեսի» մամուլի սրահում կայացած ասուլիսում նշեց ՀՀ շրջակա միջավայրի նախարարության «Հիդրոօդերևութաբանության և մոնիթորինգի կենտրոնի» տնօրենի տեղակալ Գագիկ Սուրենյանը:

Նրա խոսքով. «Մեզ սպասվում է մեր բազմամյա միջին արժեքների համեմատ բավականին շոգ և սակավատեղում օգոստոս: Օգոստոսի ամենաբարձր ջերմաստիճանները կգրանցվեն առաջին տասնօրյակում, այսպիսով՝ Շիրակում ցերեկային ժամերին՝ 32-36 աստիճան տաքություն, Կոտայքի լեռնային գոտիներ՝ 32-36 աստիճան, Կոտայքի նախալեռնային հատվածներում  ջերմաստիճամնը կարող է հասնել 36-39 աստիճանի, Գեղարքունիքում ՝ 31-35 աստիճանի:

Լոռիում առավելագույն ջերմաստիճանը կանխատեսվում է 32-35 աստիճան, Տավուշում՝ 36-39, Արագածոտնի լեռնային գոտնիներում՝ 30-34 աստիճան: Արագածոտնի նախալեռներում՝ 36-40 աստիճան կլինի, Արարատում, Արմավիրում, Վայոց ձորի նախալեռնային հատվածներում՝ 40-42 աստիճան: Վայոց Ձորի լեռնային գոտիներում՝ 30-34 աստիճան, Սյունիքի հովտային գոտի՝ 39-42 աստիճան, Սյունիքի լեռնային գոտիներում՝ 32-35 աստիճան, Սյունիքի նախալեռներում՝  32-36 աստիճան: Երևանում կանխատեսվող առավելագույն ջերմաստիճանն օգոստոսի  առաջին տասնօրյակում 40-42 աստիճան է»,-ասաց Գագիկ Սուրենյանը՝ հավելելով, որ  օգոստոս ամսվա երրորդ տասնօրյակում սպասվում է սառն օդային հոսանքների ներթափանցում:

Մանրամասն՝ տեսանյութում։