Եվրամիության անդամակցության թեկնածու երկրներին հասկացրել են, որ նրանք չպետք է մասնակցեն մայիսի 9-ին Մոսկվայում կայանալիք զորահանդեսին: Այս մասին երեկ Լյուքսեմբուրգում ԵՄ ԱԳ նախարարների հանդիպման մեկնարկից առաջ հայտարարել է Լատվիայի արտգործնախարար Բայբա Բրաժեն։ Այս մասին տեղեկացնում է DW-ի ռուսական ծառայությունը։
«Երեկ մենք զբաղված երեկո ունեցանք՝ ընթրիք արևմտաբալկանյան գործընկերների հետ… Շատ քննարկումներ եղան արժեքների, ընդհանուր արտաքին և անվտանգության քաղաքականության համակարգման, այդ թվում՝ պատժամիջոցների մասին: Այդ թվում՝ ԵՄ անդամ երկրների շատ հստակ ցուցումը թեկնածու երկրներին՝ չմասնակցել Մոսկվայում մայիսի 9-ի կայանալիք շքերթին , չկատարել նման ուղևորություններ, քանի որ դա չի համապատասխանի ԵՄ արժեքներին», — ասել է Բրաժեն։
Ինչպես հաղորդում է DW-ի թղթակիցը, մամուլի ասուլիսի ժամանակ դա հաստատել է նաև ԵՄ արտաքին գործերի և անվտանգության քաղաքականության գերագույն ներկայացուցիչ Կայա Կալլասը։ «Մենք թեկնածու երկրներին հասկացրել ենք, որ նրանք չպետք է ներկա գտնվեն մայիսի 9-ին Մոսկվայում կայանալիք ռազմական շքերթին»,- ասել է Կալլասը։
Լեհաստանի արտգործնախարար Ռադոսլավ Սիկորսկին, իր հերթին, հայտարարել է, որ Ուկրաինայի արտգործնախարար Անդրեյ Սիբիգան, իր և Կայա Կալլասի հետ համաձայնությամբ, նախարարներին հրավիրոել է մայիսի 9-ին Լվովում կայանալիք հանդիպմանը: Կարծում եմ՝ դա հիանալի գաղափար է ցույց տալու, որ Եվրոպան Ուկրաինայի, ոչ թե Պուտինի կողքին է՝ Մոսկվայում։ Ես համաձայն եմ նաև Կայա Կալլասի հետ, որ անդամ պետության կամ թեկնածու երկրի ցանկացած ներկայացուցչի ներկայությունը Մոսկվայում խայտառակություն կլինի այդ պետության համար»,- ընդգծել է նա։
