«Բողոքները «Վեոլիա ջրից» ու ջրամատակարարման հետ կապված ահագնացող են։ Դրանք ունեն նաև սեզոնային բնույթ։ Որպեսզի բացարձակ տպավորություն չստեղծվի, որ ես այսօր այստեղ կանգնած փորձելու եմ պաշտպանել «Վեոլիա ջուր» ընկերության շահերը, այո, էդ պրոցեսի մեջ ընկերությունն ունի մեղքի իր բավական լուրջ բաժինը, ինչի հետ կապված՝ Հանձնաժողովը ամենօրյա աշխատանքային ռեժիմով «Վեոլիա» ջուր ըկերության ղեկավարության հետ աշխատում է և կատարում է համապատասխան գործողություններ՝ կանխելու այդ ամենը»,- լրագրողների հետ ճեպազրույցում ասաց Հանրային ծառայությունները կարգավորող հանձնաժողովի նախագահ Մեսրոպ Մեսրոպյանը։
«Կապված ջրամատակարարման ծավալների հետ, դա այն իրողությունն է, որը խոսում է տնտեսության տվյալ ճյուղի արագ տեմպերով աճի մասին, բայց ծնում է նոր խնդիրներ։ Մասնավորապես, մայրաքաղաքում բազմաբնակարան շենքերի այս վերջին տարիներին քանակի ավելացումն է։ Երևան քաղաք մտնում է 6 հիմնական ջրատար։ Հազարավոր շենքեր են կառուցվել էս տարիներին Երևանում, բայց Երևան մուտք գործող ջրատարների քանակը չի ավելացել, ոչ էլ ջրի ծավալը։ Ավելացված շենքերը գումարվում են եղածին և բոլորը միասին օգտգործումեն նույն ջրածավալը։ Հետևաբար, ջրամատակարարման գրաֆիկը պետք է կրճատվեր»,- ասաց ՀԾԿՀ նախագահը՝ այլ պատճառներ ևս նշելով և կրկնելով, որ ՀԷՑ-ի նկատմամբ իշխանության գործողությունները և «Վեոլիա»-ի նկատմամբ այդ գործողությունների բացակայությունը քաղաքական չեն։
Մանրամասն տեսանյութում։
