Թուրքիայի արտաքին գործերի նախարար Հաքան Ֆիդանը հայտարարել է, որ իր երկիրը փակել է իր օդային տարածքը Իսրայելի համար և արգելել է թուրքական նավերի մուտքը Իսրայելի նավահանգիստներ։
«Մենք ամբողջությամբ դադարեցրել ենք առևտուրը Իսրայելի հետ, մենք թույլ չենք տալիս թուրքական նավերին մուտք գործել Իսրայելի նավահանգիստներ։ Մենք թույլ չենք տալիս իսրայելական ինքնաթիռներին մուտք գործել մեր օդային տարածք։ Չկա որևէ այլ երկիր, որն ամբողջությամբ դադարեցնի առևտրային հարաբերությունները Իսրայելի հետ», -ՏԱՍՍ-ի փոխանցմամբ, ասել է Ֆիդանը Թուրքիայի խորհրդարանի արտահերթ նիստում, որտեղ քննարկվում է Գազայի հատվածում տիրող իրավիճակը։
Ըստ Թուրքիայի արտաքին գործերի նախարարի՝ Իսրայելը խոչընդոտում է Գազայում մարդասիրական օգնության բաշխմանը՝ «օգտագործելով սովը որպես զենք»։
«Իսրայելը շարունակում է իրականացնել պետական ահաբեկչություն։ Գազայում ցեղասպանությունը խորանում է», — ասել է Ֆիդանը։
Թուրքիայի իշխանությունները նախկինում հայտնել էին, թե հանրապետությունը ամբողջությամբ դադարեցրել է առևտուրը Իսրայելի հետ 2024 թվականի մայիսին։
