ԱՄՆ նախագահ Դոնալդ Թրամփը կարծում է, որ Ուկրաինայի հակամարտության կարգավորումն արդեն շատ մոտ է։ Նա այս մասին հայտարարել է Ֆլորիդայում կայացած «Ամերիկայի վահան» գագաթաժողովում իր ելույթի ժամանակ։
ԱՄՆ առաջնորդը խոսել է նոր ռազմանավերի կառուցման մասին եւ նշել, որ դրա ֆոնին իրեն կարող են ընկալել որպես «շատ ռազմատենչ»։
«Ես նա եմ, ով ավարտել է ութ պատերազմ։ Եվ կարծում եմ, որ եւս մեկը ճանապարհին է»,- ասել է Թրամփը։
Նա ավելացրել է, որ Միացյալ Նահանգները մի քանի անգամ մոտ է եղել Ուկրաինայում խաղաղություն հաստատելուն, բայց, արդյունքւոմ, հակամարտության կողմերից մեկը նահանջել է։ Թրամփը նաեւ նշել է, որ Ռուսաստանի նախագահ Վլադիմիր Պուտինի եւ Ուկրաինայի նախագահ Վլադիմիր Զելենսկու միջեւ «ատելությունը» «շատ մեծ է»։
ԱՄՆ միջնորդությամբ խաղաղության բանակցությունների նախորդ փուլը տեղի է ունեցել Ժնեւում փետրվարի 17-18-ին։ Ռուսաստանի պատվիրակությունը գլխավորող, նախագահի օգնական Վլադիմիր Մեդինսկին հանդիպումները որակել է որպես «դժվար, բայց գործնական»։ Մարտի 3-ին Կրեմլի մամուլի քարտուղար Դմիտրի Պեսկովը հայտնել էր, որ նոր փուլի համար կոնկրետ ամսաթիվ կամ վայր չկա, եւ որ Աբու Դաբիում բանակցությունների անցկացումը կասկածի տակ է Մերձավոր Արեւելքում Իրանի դեմ ամերիկա-իսրայելական գործողության հետ կապված ճգնաժամի պատճառով։
Bloomberg-ի մարտի 2-ի տվյալներով՝ բանակցությունների նոր փուլը կարող է տեղի ունենալ Ստամբուլում։
