Արցախից բռնի տեղահանվածները Գյումրիի նախկին ինֆեկցիոն հիվանդանոցի շենքում ապրում են արդեն 2 տարի։ Նրանք հիմնականում միայնակ տարեցներ են, անաշխատունակ, սոցիալապես անապահով և հաշմանդամություն ունեցող անձինք։
Այս ընտանիքներին կացարանով ապահովելուց հետո, պետությունն ի սկզբանե նրանց չի վճարել բնակվարձի և կոմունալ վճարների համար տրամադրվող աջակցությունը: Այս ընտանիքների միակ եկամուտը թոշակն է, որով էլ ապրում են, մի կերպ ծայրը ծայրին հասցնելով։ Նշված իրավիճակում հայտնված արցախցիների համար երազանք է սեփական տանիք ունենալը։
Մեր ունեցած տեղեկություններով, Շիրակի մարզում ապաստան գտած էլի շատ արցախցիներ կան, ովքեր ցանկություն են հայտնել ապրել այս կացարանում, բայց նախկին ինֆեկցիոն հիվանդանոցի շենքում այլևս ազատ սենյակներ չկան։ Այստեղ ոչ բոլորն առանձին սենյակներ ունեն, կան ընտանիքներ, որ 3 հոգով ընդամենը մի հիվանդասենյակում են տեղավորվել։ Բնակության պայմաններն այստեղ հանրակացարանային են, ընդհանուր խոհանոցով ու լոգարանով։
Ի դեպ, Շիրակի մարզում բնակություն է հաստատել Արցախից բռնի տեղահանված մոտ 3000 արցախցի։
Մանրամասն՝ տեսանյութում։
