«Եթե սոցփաթեթի շահառու չեք, ապա ձեր եկամուտն ընդամենը 300 դրամով է պակասում, բայց դառնում եք ապահովագրված՝ ստանալով մատչելի կամ անվճար առողջապահական ծառայություններ։ Սա հնարավոր է դառնում պետական սուբսիդավորման շնորհիվ։

Բայց եթե սոցփաթեթի շահառու եք, այդ նույն բանի համար ձեր եկամուտը պակասելու է 6300 դրամով, քանի որ պետությունը Ձեզ համար սուբսիդավորում չի նախատեսել։

Սոցփաթեթի շահառուներն արդեն իսկ ունեին անվճար առողջապահական ապահովագրություն, մինչև «համընդհանուրի» գործարկումը, լրացուցիչ էլ ունեին 72 000 դրամ գումար, որով կարող էին հանգստանալ, վարկ մարել, ատամնաբույժի գնալ, կանխիկացնել, և այլն։ Այժմ, նրանց համար ապահովագրությունը դառնում է վճարովի, այն էլ՝ ավելի թանկ, քան մյուս աշխատողների համար։

Հայաստանի պետհիմնարկների, ՏԻՄ-երի աշխատողների արհմիությունը դիմել է Կառավարությանը, նշելով, որ սոցիալական փաթեթի շահառուների շրջանում տարակուսանք և դժգոհություն է առաջացել ԱՀԱ համակարգում ներառվելու պայմանների անհամաչափության վերաբերյալ, ինչն արդարացի է նման խտրական կարգավորման դեպքում։

Բազմիցս հայտարարվում է, որ պետական աշխատողներն առանց այդ էլ ցածր են վարձատրվում, սակայն վերոնշված կարգավորումներով սոցփաթեթի շահառուների համար հավելյալ ֆինանսական բեռ է ավելանում։

Որպես պետական և համայնքային ոլորտի աշխատողներին միավորող և շահերը ներկայացնող արհմիություն՝ խնդրել ենք վերանայել վերոնշված մոտեցումը՝ պահպանելով աշխատողների սոցփաթեթի 72000 դրամը և սուբսիդավորել ապահովագրավճարը, ինչպես դա արվում է մնացած աշխատողների պարագայում»։