Կառավարությունն իր այսօրվա՝ հունիսի 5–ի նիստում որոշում կայացրեց, ըստ որի Սևանա լճից ոռոգման նպատակով ջրառ կկատարվի։
Ըստ հիմնավորման՝ որոշման նախագծի ընդունումը պայմանավորված է ոռոգման ջրառաջարկի դեֆիցիտը մասնակի մեղմելու անհրաժեշտությամբ:
«Սևան-Հրազդան դերիվացիոն համակարգից սնվող ոռոգման համակարգերի իշխման տակ գտնվող ոռոգելի հողերից 2025 թվականի ոռոգման շրջանում, ջրօգտագործողների կողմից ներկայացված ջրապահանջի համաձայն, պայմանագրային ոռոգվելիք հողատարածությունների մակերեսը կազմել է շուրջ 30 հազ հա, իսկ ոռոգման ջրի պահանջարկը համակարգերի գլխամասերում և Հրազդան գետի հունի լվացման նպատակով գետի հունով բացթողնվող ջրի ծավալը կկազմի շուրջ 446.1 մլն մ3»,- նշված է հիմնավորման տեքստում։
Նշված ծավալի ջրի պահանջարկը նախատեսվում է ապահովել Հրազդան գետից շուրջ 201.7 մլն մ3, Ազատի ջրամբարից շուրջ 65.2 մլն մ3, Ապարանի ջրամբարից շուրջ 20.4 մլն մ3 ջրաքանակներով` հաշվի առնելով ՀՀ ՇՄՆ «Հիդրոօդերևութաբանության և մոնիթորինգի կենտրոն»-ի` ՀՀ գետերի 2025թ. գարնանային վարարումների կանխատեսումը: Միաժամանակ նախատեսվում է Մխչյանի և Ռանչպար-Արևշատ պոմպակայանների առավելագույն հզորությամբ գործարկմամբ ապահովել շուրջ 31,3 մլն մ3 ջրարտադրություն (ընդամենը՝ 318.6 մլն մ3):
Կառավարության որոշման նախագծով նախատեսվել է լճից ոռոգման նպատակով մինչև 131.8 մլն մ3 ծավալով բացթողում` ներառյալ ջրօգտագործման թույլտվությամբ սահմանված «Գեղարքունիք» ջրօգտագործողների ընկերության 4.3 մլն մ3 ծավալով ջրառը:
Օրենքով Սևանից սահմանված է 170մլն մ3 ջրառ։ Նշենք, որ 2024 թվականին Սևանա լճից ջրառի ծավալը չի գերազանցել օրենքով նախատեսված 170մլն մ3–ը։
