Ռոբերտ Քոչարյանին առաջադրված մեղադրանքը միգուցե գրական տեքստի տեսակետից կարող է հետաքրքիր հնչել, բայց իրավաբանորեն բովանդակում է աբսուրդներ։ Այս մասին, այսօր՝ սեպտեմբերի 19–ին, դատարանի մոտ լրագրողների հետ զրույցում նշեց երկրորդ նախագահ պաշտպաններից Արամ Օրբելյանը։
«Ռոբերտ Քոչարյանն ասել է՝ նախագահն այլ նախագահի իշխանություն չի փոխանցում, չկա այդպիսի բան, իշխանության փոխանցման գործընթաց չկա։ Նորընտիր նախագահը լիազորությունները ստանձնում է ԱԺ նիստում արարողության ընթացակարգով։ Նույնիսկ ֆորմալ առումով ինչ-որ ձևական բանալու փոխանցում չկա։ Մեղադրանքը ձևակերպված է հետևյալ կերպ, «Ռոբերտ Քոչարյանը նպատակ ունենալով իշխանությունը փոխանցել իր մտերիմ Սերժ Սարգսյանին», պարոն նախագահն ասում է, որես ոչ մի բան չեմ փոխանցել, իշխանությունը փոխանցել է ժողովուրդը՝ ընտրությունների միջոցով ընտրելով, երկրորդը սույն մեղադրանքի շրջանակներում ուղղակիորեն արձանագրված է, որ կասկածի տակ չեն դրվում ընտրության արդյունքները։
Այսինքն մենք հստակ արձանագրել ենք, որ ցանկացած անձ, ով կլիներ գործող նախագահը, պարտավոր էր ձեռնարկել օրենքով սահմանված բոլոր միջոցները, որպեսզի նորընտիր նախագահը ստանձնի իր պարտականությունները։ Ավելին, ցանկացած գործողություն, որը դրան հակառակ կլիներ, կլիներ ոչ իրավաչափ և կլիներ իր իշխանության յուրացման տարրերով»,–ասաց նա։
Օրբելյանը պնդեց, որ Ռոբերտ Քոչարյանը առկա մեղադրանքի շրջանակներում չի կարող որևէ կերպ մեղավոր ճանաչվել, առկա մեղադրանքը չի կարող քննարկման առարկա դառնալ և քննարկվող գործերի շրջանակներում Ռոբերտ Քոչարյանը որևէ հանցավոր արարք չի կատարել։
Մանրամասն՝ տեսանյութում։
