Փաշինյանն ու Ալիևը կմեկնեն Վաշինգտոն՝ Դոնալդ Թրամփի «Խաղաղության խորհրդի» գագաթնաժողովին մասնակցելու համար։ Այս մասին X սոցիալական ցանցում գրել է ԱՄՆ-ում բնակվող ադրբեջանցի լրագրող Ալեքս Ռաուֆօղլուն։
«Ըստ աղբյուրների տվյալների՝ փոխնախագահ Վենսի՝ Հարավային Կովկաս կատարած այցից հետո, Ադրբեջանի նախագահ Ալիևը և Հայաստանի վարչապետ Փաշինյանը ծրագրում են փետրվարի 19-ին այցելել Վաշինգտոն՝ Թրամփի «Խաղաղության խորհրդի» գագաթնաժողովին մասնակցելու համար», — նշել է նա։
Ավելի վաղ Axios պարբերականը, հղում անելով ամերիկացի պաշտոնյային և Խորհրդի անդամ չորս երկրների դիվանագետներին, հայտնել է, որ Սպիտակ տունը ծրագրում է փետրվարի 19-ին Գազայի հարցով «Խաղաղության խորհրդի» առաջնորդների հանդիպում անցկացնել: Ըստ հրապարակման տվյալների՝ ԱՄՆ վարչակազմը մտադիր է օգտագործել այս հանդիպումը՝ Գազայում հրադադարի համաձայնագրի երկրորդ փուլի իրականացմանն աջակցելու և տարածաշրջանի վերականգնման համար միջոցներ ներգրավելու նպատակով:
«Սա կլինի Խաղաղության խորհրդի առաջին նիստը և Գազայի վերականգնման համար միջոցների հայթայթմանն ուղղված համաժողովը», — հայտարարել է ամերիկացի պաշտոնյան:
Նշվում է, որ գագաթնաժողովի ծրագրերը դեռևս գտնվում են վաղ փուլում և կարող են փոփոխվել: Սպիտակ տունը հրաժարվել է մեկնաբանություններից:
