«Առողջական վիճակի մասին. իհարկե, որքան էլ պարոն նախագահը չի սիրում, որ այս հարցը բերվում է առաջին պլան, որքան էլ մեր կառավարության ղեկավարը փորձում է դա ամենագռեհիկ, ամենաստոր ձևերով մանիպուլացնել… այդ շահարկու՛մ… շահարկում չասեմ, այդ պատճառաբանությունները, պետք է ասեմ հետևյալ իրողությունների բազային մակարդակը։

Նաև իմ ներգրավման հիմնական առանցքը դարձավ այն պահը, երբ փաստաբանական թիմի քննարկումների ընթացքում տեսա բժշկական փաստաթղթերը, էպիկրիզներն ու հասկացա, որ այստեղ խնդիր կա։ Իհարկե, բուն կալանավորման օրվա իրավիճակի համեմատությամբ, նախագահ Քոչարյանի առողջական վիճակն այժմ լավ է, նորմալ է, չնայած նրան, որ ցուցված է լինել սրտաբանի հսկողության տակ, երկու ստենտավորումից հետո ձերբակալման օրն ունենալ հիպերտոնիկ կրիզ և այլն։

Չեմ ուզում շատ մանրամասների մեջ խորանալ՝ հաշվի առնելով պարոն նախագահի դիրքորոշումը, բայց լավագույն ցուցիչը, որը ցույց էր տալիս, թե ինչպիսին էր նախագահ Քոչարյանի առողջական վիճակը նրան կալանավորելու օրը, այն էր, որ հենց ձերբակալումից և հոսպիտալացումից հետո, երբ 24 ժամը լրանում էր, նրա վիճակը թույլ չէր տալիս շարունակել դատական պրոցեսը։ Իրավապահները ստիպված եղան երկրորդ անգամ ձերբակալման որոշում կայացնել, քանի որ առաջին ձերբակալումից անցել էր 24 ժամ։ Երկրորդ անգամ կայացրեցին այդ որոշումը․ ամբողջ գիշեր շտապօգնության մեքենան գտնվում էր դատական նիստերի դահլիճի կողքին, և մենք շուրջ երկու-երեք անգամ բավական երկար ժամանակով ընդմիջում հայտարարեցինք, որպեսզի կարողանայինք իրավիճակը ստաբիլիզացնել ու նոր շարունակել»,- այս մասին հրավիրված ասուլիսում ասաց փաստաբան Տաթևիկ Սողոյանը։

Մանրամասն՝ տեսանյութում։